Ginabutyag sa nagharing sistema ang kaugalingon niining kadunot sa gakahitabo karong reaksyunaryong eleksyon. Sa miaging mga bulan sa kampanya para sa piniliay sa senado, kongreso ug mga lokal nga gubyerno, nasaksihan sa katawhan kung giunsa pagdomina sa mga dinastiya ug partidong nagarepresenta sa interes sa mga langyawng imperyalista ug pipila ug dili sa mayorya sa katawhan ang eleksyon sa Pilipinas.

Ang eleksyong 2025 giharian sa pinakadunot nga mga paksyon sa nagharing hut-ong: sa mga Marcos ug Duterte, nga parehong notoryus sa korapsyon, pagpanumpo ug pagpangdaugdaug sa katawhan, ug sa pagsunud-sunod sa mga dikta sa langyawng imperyalista. Nagbangi sila karon sa gahum sa tumong nga palapdon ang ilang bahandi ug burukratikong pribilehiyo, ug makalikay sa mga tulubagon sa mga krimen nila sa katawhan.

Gusto sa paksyong Marcos nga harian ang kongreso, senado ug mga LGU aron labaw pang pahugton ang kontrol sa poder ug mugnaon ang kundisyon alang sa pagpalapad sa gahum sa ilang dinastiya lapas sa 2028. Ang pagpapriso kang Duterte sa International Criminal Court kung asa ginataral siya sa mga krimen batok sa katawhan gihatagag dalan ni Marcos sa pagsulay nga idiskaril ang mga karibal niya sa pulitika. Subsub ang pakulo ug gimik sa rehimeng Marcos aron makuha ang lapad nga suporta sa katawhan. Ingonman, pakyas kining tabunan ang grabeng krisis sa kalisud tungod sa walay hunong nga pagsaka sa presyo sa mga palaliton, ubos nga suhulan ug kawalay panginabuhian.

Giapas sa mga Duterte nga masulod ang igong ihap sa ilang mga alipures sa Senado, nag-una para babagan ang impeachment kang Vice President Sara Duterte, nga akusado sa maanomalyang paggasto sa gatusan ka milyong pisong badyet sa gubyerno. Aron maagni ang simpatya sa katawhan, ginapagawas nila nga sila mga biktima sa pulitikanhong pagpanumpo ni Marcos. Apan pakyas sila nga paphaon ang lab-as nga panumduman sa masa sa malukpanong kabangis ug pag-antus ilalum sa miaging rehimen ug tabunan ang singgit sa katawhan alang sa hutisya sa tanang biktima sa pasistang mga krimen sa tiranong si Duterte.

Ginapakita sa dominasyon sa duha ka dunot nga paksyon sa eleksyong 2025 ang talamayon nga eleksyon ilalum sa semikolonyal ug semipyudal nga sistema sa Pilipinas. Lumba kini sa pipila ka gamhanan. Walay tinuod nga espasyo ang pagsalmot sa masang dinaugdaug ug pinahimuslan. Ginapagawas nga demokratiko ang eleksyon, bisan ang tinuod, para lamang kini sa mga burukrata-kapitalista, mga burgesya-kumprador ug agalong yutaan.

Sa milabayng mga bulan, milanog ang pagsalmot sa mga demokratiko, progresibo ug makinasudnong kandidato ug partido sa eleksyon sa senado ug kongreso. Gidala nila sa kampanyang eleksyon ang mga panawagan alang sa makabuhing suhulan ug sweldo, tinuod nga reporma sa yuta, pagpaubos sa presyo sa mga palaliton, libreng serbisyong panglawas ug edukasyon, trabaho, katungod, kagawasan ug uban pang pangayo sa katawhan. Naggikan ang mayorya kanila sa han-ay sa mga mag-uuma ug mamumuo, mga kabus-sa-kasyudaran, mangingisda, drayber ug uban pang nilupigang sektor.

Sukwahi kanila ang mga reaksyunaryong pulitiko nga nagpabungul-bungol sa mga singgit sa katawhan. Kung magpakaaron-ingnon mang maka-masa, hangtud eleksyon lang. Gamit ang ilang dakung bahandi, gidominahan na usab nila karon ang sistemang party-list ug gihikawan og espasyo ang mga partidong tinuod nga nagarepresenta sa kabus nga sektor sa katilingban.

Gatusan ka milyong piso ang gigasto nila alang sa mga adbertisment sa radyo ug telebisyon, aron lukupon ang mga pader ug poste sa ilang mga poster ug mamudmod og mga sanina nga adunay nawong ug pangalan nila. Dungan niini, daw mga ulod nga mitunga ang mga sarbey aron impluwensyahan ang hunahuna sa katawhan. Inubanan kini sa paggamit sa mga binayrang impluwenser sa social media aron iduso ang diskurso pabor sa interes sa mga pulitiko o partido. Gatusan ka milyong piso ang siguradong mobaha pa samtang nagkaduul ang mismong adlaw sa eleksyon aron ipamalit og boto.

Walag too ang mga kaso sa pagpatay ug kabangis sa mga magkaaway nga pulitiko sa lain-laing bahin sa nasud. Kabangis usab sa estado ang gigamit sa mga ahente sa militar, pulis ug NTF-Elcac aron pig-oton ang mga progresibong kandidato ug partido, sa porma sa pagpaniktik, pagpasaka og hinimu-himong kaso, pag-aresto ug pagpriso, ug pagpahadlok sa ilang mga pwersa ug tigsuporta.

Siguradong subling pagagamiton sa nakalingkod sa gahum ang dekompyuter nga pag-ihap sa mga boto aron mopabor kanila ang resulta sa eleksyon. Maong nagkakusog ang panawagan alang sa manumanong pag-ihap sa boto nga maghatag unta og dakung kasiguruhan nga tukmang maihap ang mga boto. Ingonman, padayon kining ginabalewala sa Comelec. Gibanabanang dakung ihap sa mga migranteng mamumuong Pilipino ang wala makabotar sa gihimong online voting.

Asaman sa paksyong Marcos o Duterte ang modaug sa umalabot nga eleksyon, siguradong padayon ug labaw nga mopaspas ang pagkadunot sa reaksyunaryong estado, atubangan sa walay kasulbarang krisis sa nagharing sistema. Padayon kining magpatuman sa mga programa ug balaod nga pabor sa interes sa imperyalismong US, sa dagkung langyawng kumpanya ug sa mga nagharing hut-ong, nga magdala og labawng pag-antus sa katawhan. Siguradong mograbe pa ang korapsyon sa pagbawi sa mga burukrata-kapitalista sa gatusan ka milyong gipuhunan nila sa eleksyon.

Kinahanglang padayon nga palig-onon ang solidong organisadong han-ay sa katawhang Pilipino ug magpursigi sa dalan sa militanteng pagsukol, ilabina sa pag-atubang sa dakung pakigbisog sa umalabot nga mga bulan ug tuig, lakip ang pag-abli sa pagdungog sa Senado kalabot sa impeachment ni Sara Duterte ug pagtaral kang Rodrigo Duterte sa ICC, ingonman batok sa nagkagrabeng interbensyong militar sa US sa Pilipinas ug pagpanulsol niini og gubat kontra sa China, sa pagpakaitoy ni Marcos, sa anti-katawhan ug paantus nga palisiya, korapsyon, kainutil ug pasistang pagpanumpo ug pag-atake sa rehimeng Marcos sa katawhan.

Sa miaging mga bulan, daghan na usab kaayo ang nahigmata sa kadunot sa reaksyunaryong eleksyon ug mini nga demokrasya ilalum sa nagharing sistema. Ginapakita niini sa katawhan nga tinuod gyud nga rebolusyonaryong kausaban ang solusyon sa mga pundamental nga problema sa katawhan. Padayon nga nagkakusog ug nagkalapad ang National Democratic Front ug tanang alyado niining organisasyon, ug ginahimo ang tanang makaya aron motabang sa pagpakusog sa Bagong Hukbong Bayan ug pagpaasdang sa armadong pakigbisog.

Sa kabanikanhan, padayon nga nakalahutay ug nakapakusog ang BHB taliwala sa walay hunong ug brutal nga gubat sa pagpanumpo sa rehimeng Marcos. Padayon nga ginapalalum ug ginapalapad sa BHB ang koneksyon niini sa masang mag-uuma aron iasdang ang ilang mga anti-imperyalista, anti-pasista ug antipyudal nga pakigbisog, pakusgon ang ilang mga organisasyong masa, ug ilunsad ang makayang mga taktikal nga opensiba. Sa giya sa Partido ug sa kalihukang pagtul-id, siguradong padayon nga baktason sa gubat sa katawhan ang dalan sa pag-abante.