Makaplagan ang pinakadakung ihap sa mga mamumuong Pilipino sa Southern Tagalog. Sa kinatibuk-an, 18% sa tibuok pwersa sa pamuo sa nasud ang anaa sa rehiyon. Ikaduha dinhi ang National Capital Region kung asa 10.4 milyon ang mga mamumuo. Nakakonsentra sa Calabarzon ang 12.1 milyon sa 14.2 milyong pwersa sa pamuo sa rehiyon.

Wala pay labot dinhi ang hiwala ginaila sa estado nga pwersa sa pamuo sama sa mga asawa sa panimalay, retirado, out-of-school youth, nakagradweyt apan walay trabaho, may kabilinggan, ug mga wala nangita og trabaho sulod sa unum ka bulan. Sa pinakaulahing sarbey sa reaksyunaryong estado, ang “labor force participation rate” o porsyento sa populasyong edad 15 pataas nga lakip sa pwersa sa pamuo 64.8% lamang sa Calabarzon ug 64.2% sa Mimaropa.

Sa mga adunay trabaho, 1/3 ang nakategoryang self-employed o nag-empleyo sa kaugalingon. Gawas dinhi, adunay 7% gilakip sa employed apan walay sweldo o wala ginabayaran ang pagtrabaho. Kung i-usa ang duha ka kategorya, 35% kini sa pwersa sa pamuo nga mikabat og 3.2 milyon sa tibuok rehiyon. Kung idugang kini sa upisyal nga ihap sa walay trabaho, mokabat sa 3.7 milyon ang walay pormal nga panginabuhian sa han-ay sa 9.2 milyong pwersa sa pamuo sa Southern Tagalog. Dugang kanila ang 1.4 milyong mamumuo nga underemployed o kulang sa trabaho.

Ubos nga suhulan

Ang mamumuo sa rehiyon naglangkub sa 64% sa pwersa sa pamuo nga adunay trabaho. Anaa sa pribadong kumpanya ang 4.4 milyon, samtang empleyado sa gubyerno ang 777,000.

Ubos kaayo ug dili makabuhi sa pamilya ang suhol nga ginabayad sa kapitalista ug burukrata-kapitalista sa mga mamumuo, sa pribado man o sa sektor publiko. Sa Calabarzon ang minimum nga suhulan niadtong Mayo 2024 moabot sa ₱522 lamang kada adlaw samtang ang gitakda nga makabuhi nga suhulan alang sa 5-ka-tawong pamilya mokabat sa ₱1,122 matag adlaw. Sa Mimaropa, makaluluoy nga ₱352 kada adlaw ang minimum na suhulan niadtong Marso 2024, layo sa gitakdang makabuhi nga suhulan alang sa 5-ka-tawong pamilya nga ₱1,213. Daw palisiya sa reaksyunaryong gubyerno ang dili makitawhanong kita sa mamumuo.

Milyun-milyon ang mga mamumuo apan gamay lang ang organisado sa mga unyon nga nag-unang organisasyon nga magaasdang sa ilang katungod sa makatarunganong suhulan. Sa rekord niadtong 2021-2022, sa 34,543 kumpanya sa nasud nga adunay 20 pataas ka mamumuo, 1,464 kumpanya o 4.2% lamang ang adunay rehistradong unyon. Mas gamay kini sa kanhing 6.3% niadtong 2018.

Terorismo ang tubag sa rehimen sa pagsukol sa hut-ong mamumuo

Ang kanhing pasistang pagpanumpo sa pag-unyon sa mga mamumuo gilabwan pa sa dayag nga terorismo sa estado pinaagi sa pagbalaod sa Anti-Terrorism Law. Ang reaksyunaryong estado ang naghimo og terorismo sa yanong katawhan ilabina batok sa mga mamumuo, aktibista, mga tawong adunay makatarunganong adbokasiya ug mga kritiko sa gubyerno. Kaylap nga ginagamit sa mga militar, pulis ug ahensya sa estado sama sa NTF-Elcac ang Red-tagging nga nagapuntirya sa lider ug aktibistang myembro sa unyon. Pagpangandam kini aron ipatuman ang pagpatay, pagdagit ug pagwala kanila. Nabantog nga pananglitan niini ang operasyon sa PNP-Calabarzon nga gitawag og Bloody Sunday niadtong Marso 7, 2021 nga mipatay sa siyam ka lider ug organisador lakip ang lider-mamumuong si Manny Asuncion. Human ang pipila ka semana, gipatay usab si Dandy Miguel, presidente sa unyon sa Fuji Electronics sa Laguna.

Niadtong sayong bahin sa 2023, usa ka delegasyon sa International Labour Organization (ILO) ang naghimo og imbestigasyon sa kahimtang sa mga unyon ug gikundena ang panghunahuna sa reaksyunaryong gubyerno nga kanunay ginalambigit ang unyonismo sa komunismo. Gikan 2016, 76 ka unyonista ug organisador ang natahong gipatay sa mga pwersang pangseguridad sa estado. Bisan human ang misyon sa ILO sa nasud, upat pa ka mga unyonista ang nataho nga gipatay.

Gikan sa Kalatas, Mayo 2025.