Nataho ang duha ka kaso sa pagdagit sa mga lider-masa sa Southern Tagalog sa milabayng duha ka semana. Gawas niini, adunay mga paglapas sa tawhanong katungod ang mga sundalo ug pulis sa Isabela, Quezon, ug Metro Manila.

Sa Batangas, gidagit sa mga pwersa sa estado si Pauline Joy Banjawan, organisador sa Kadamay-Southern Tagalog nga nagkampanya alang sa Bayan Muna, niadtong Abril 26. Duha ka adlaw human sa iyang pagkawala, nakaplagan siya sa istasyon sa pulis sa Santo Tomas, Batangas.

Nasuta nga gidagit siya sa 59th IB, gipailalum sa usa ka adlaw nga tortyur ayha gidala sa mga pulis. Gipasakaan siya og kasong illegal possession of firearms and explosives.

Sa Rizal, gidagit ug gipriso sa mga sundalo sa 80th IB ang mag-uumang si Jonathan del Castello niadtong gabii sa Abril 27 sa Tanay. Sumala sa biktima, giinterogar siya ug gihulgang patyon sa mga sundalo. Giakusahan siya nga ang pagkaon nga iyang dala atol sa pagdakop kaniya para sa Bagong Hukbong Bayan (BHB). Gibuhian lang siya sa 80th IB niadtong kaadlawon sa Abril 28.

Istraping. Sa Isabela, girakrakan sa mga elemento sa 502nd IBde ang lima ka nasudnong minoryang Ifugao samtang nangisda niadtong Abril 21 sa Sityo Sapiot, Barangay Tappa, San Mariano. Tulo sa mga sibilyan ang luwas nga nakauli samtang duha ang wala dayon makita. Namusil usab ang 86th IB ang Barangay Dicamay Dos, Jones niadtong Abril 20.

Militarisasyon. Sa Quezon, dili moubos sa 2,000 ka sundalo sa 2nd ID ang gibubu alang sa focused military operation (FMO) sa upat ka barangay sa Lopez sugod niadtong Abril 21. Daghang tsekpoynt ang gimuntar sa militar ug pulis nga mitugaw sa panginabuhi, pag-uma, ug gawasnong paglihok sa mga residente. Ginapangayoan og sedula ang tanang molabay sa tsekpoynt.

Pagpamig-ot. Giharang sa airport ug gibawalang makasulod sa Pilipinas niadtong Abril 26 si Gordon Mutch, Amerikano nga myembro sa Baltimore Committee for Human Rights in Philippine (BaltCHRP). Mianhi si Mutch sa Pilipinas aron mag-obserba sa eleksyon sa 2025 ug makita ang kahimtang sa mga Pilipino ilalum sa rehimeng Marcos. Gidetine siya sa Philippine Bureau of Immigration sulod sa upat ka oras, unya gi-deport sa US tungod sa iyang “kontra-gubyerno nga mga kalihukan.”