Gipasidunggan sa Partido Komunista ng Pilipinas ug Bagong Hukbong Bayan (BHB)-Negros Island (Apolinario Gatmaitan Command) ang pito ka Pulang manggugubat nga napatay sa “overkill” nga armadong operasyon sa Armed Forces of the Philippines (AFP) niadtong Abril 27 sa buntag sa Barangay Tapi, Kabankalan City, Negros Occidental. Namatay ang Kabankalan 7 samtang nagpatuman sa ilang bulawanong buluhaton sa padayon nga pagpalambo sa armadong pakigbisog, pagpalapad sa baseng masa ug agraryong rebolusyon sa isla.

Ang pito ka namartir mao sila Reniel Locsin Cellon (Ka Randy), Mary Jane Magquilat (Ka Shonie), Charity Amacan (Ka Mayang), Johnrey Mejares (Ka Jai), Glenda Tinio Mejares (Ka Glendyl), Ka Pitong, ug Dee Supelanas (Ka Dahlia). Si Supelanas kanhing lider estudyante sa UP-Cebu. Tulo sa mga martir mga senior citizen ug adunay mga kabilinggan sa panglawas nga nakapalisod sa ilang paglihok.

Niadtong Abril 29, nagtapok ug nag-ugbok og kandila ang mga kabatan-onan sa University of the Philippines (UP)-Cebu aron pasidunggan si Supelanas. Sa wala pa siya nahimong Pulang manggugubat, si Supelanas usa ka aktibista ug lider-estudyante nga nangulo sa mga kampanya alang sa edukasyon, katilingbanong serbisyo, demokratikong katungod, ug pagbatok sa tiranya ug pasismo.

Nagpadayag og simpatiya ang Partido ug BHB-Negros Island sa mga pamilya, higala, ug kauban sa Kabankalan 7. “Samtang nagbangutan, gamiton kini nga higayon aron labaw pang palig-onon ang rebolusyonaryong diwa isip pamaagi sa pag-angkon og hustisya alang sa atong mga martir,” matud ni Ka Marco Valbuena, upisyal sa impormasyon sa Partido.

Gisaway usab ni Valbuena ang pagpasipala sa National Task Force-Elcac ug AFP sa dungog ni Supelanas. Ginapakaylap sa pwersa sa estado nga siya “biktima sa manipulasyon” sa Partido ug BHB, bisan pa sa kamatuoran nga liboan ka kabatan-onan na ang misalmot ug mosalmot pa sa rebolusyonaryong kalihukan tungod sa ilang gugma sa nasud.

Samtang ang grupo sa tawhanong katungod nga Kapatid nanawagan og imbestigasyon sa pagpatay sa Kabankalan 7, nagduhaduha sila kung “tinuod ba nga engkwentro sa militar ang nahitabo o tinuyo nga pagpatay.” Nagduda ang grupo nga wala’y bisan usa nga nakaluwas sa pito ka Pulang manggugubat.

Matud niini, labaw nga mas kusog ug superyor ang armas ug pwersa sa AFP kumpara sa mga Pulang manggugubat, apan nganong wala na lang sila gi-aresto? “Nganong wala ni usa kanila—o bisan tanan sila—giaresto ug gipasang-atan og kaso? Aron mahimong mga bilanggong pulitikal imbis nga patyon dayon?”