Dala ang mga bandera sa National Democratic Front (NDF) ug sa mga kaalyadong organisasyon niini, naglunsad og raling pinakilab ang gatusan ka mga myembro sa lain-laing rebolusyonaryong grupo sa Divisoria sa Maynila niadtong Abril 29 aron saulugon ang anibersaryo sa NDFP. Ang ilang panawagan: “Armadong rebolusyon ang tinuod nga solusyon!” Gisaulog sa NDFP ang ika-52 nga anibersaryo niini niadtong Abril 24.

Nagsab-it og mga istrimer ang Christians for National Liberation (CNL) ug Revolutionary Council of Trade Unions (RCTU) duul sa Malacañang uban sa panawagan sa pagpaasdang sa rebolusyon.

Sumala kang Elias Dipasupil, pangkinatibuk-ang kalihim sa NDFP, ang NDFP mao ang organisasyon sa nagkahiusang prente para sa rebolusyonaryong armadong pakigbisog. “Samtang giila ang lain-laing porma sa pakigbisog, ginasuportahan sa NDFP ang armadong pakigbisog isip nag-unang porma aron mabungkag ang dunot nga semikolonyal ug semipyudal nga sistema samtang hinay-hinay ug padayon nga ginatukod ang bag-ong sistema pinaagi sa pagpalambo sa mga organo sa pulitikanhong gahum sa kabaryohan.”

Giawhag niya ang mga alyadong organisasyon nga magpalapad ug magpakusog. “Sa kasamtangang kalibutanon ug nasudnong krisis, gikinahanglan kaayo ang mga organisasyong masa alang sa pakigbisog sa katawhang Pilipino batok sa pagpanglupig ug pagpahimulos, ug sa pagtukod sa katilingbang angay kanila, nga nag-alagad sa ilang mga interes,” matud pa niya.

Gitimbaya sa lain-laing mga organisasyon gikan sa rehiyonal hangtud nasudnong ang-ang, ug mga partido sa gawas sa nasud ang anibersaryo sa NDF. Lakip dinhi ang PKP, BHB, mga balangay sa NDF sa Southern Tagalog ug Ilocos, NDF-Palawan, NDF-International, Liga ng Agham para sa Bayan, Makabayang Kilusan ng Bagong Kababaihan, RCTU, Kabataang Makabayan ug KM-Southern Tagalog, Compatriots, CNL ug Pambansang Katipunan ng mga Magbubukid.

Gitimbaya usab ang NDF sa Friends of the Filipino People in Struggles (FFPS) ug sa mga balangay ug organisasyon niini. Naglunsad ang FFPS og mga kalihukan ug panagtapok sa lain-laing nasud niadtong Abril 26 isip pagsaulog. Nagpadangat usab og mga pagtimbaya ang International Bureau sa Partido Komunista sa Turkey (TKP-ML) ug Cairde na Filipínigh Committee sa Anti-Imperialist Action Ireland.