Ang prubinsya sa Cavite ang usa sa mga naigo sa kusog nga pagbundak sa ulan tungod sa bagyong Crising ug habagat. Niadtong Hulyo 22, gideklara ang state of calamity sa tibuok prubinsya.

Dili moubos sa siyam ka lungsod ug munisipalidad sa prubinsya ang gilunop. Sa Bacoor, 43 sa 47 ka barangay ang naapektuhan. Mayorya sa nanimuyo dinhi mga kabus-sa-kasyudaran, mamumuo ug mangingisda. Bisan ang dakung engklabo sama sa Cavite Economic Zone (CEZ) dili luwas sa lunop. Mikabat sa 1,345 ka pamilya ang mibakwit tungod dinhi.

Anaa sa 30,000 ka lokal nga mangingisda usab ang naapektuhan ang panginabuhian tungod sa kakusog sa balod.

Gibanabanang anaa sa ₱3.2 milyon ang bili sa nadaut nga produkto sa agrikultura sa lungsod sa Alfonso, Naic, ug Tanza. Naguba usab ang ₱1.5 milyon nga bili sa humay sa lungsod sa General Trias, Imus ug Naic, ug ₱407,500 bili sa mais sa lungsod sa Alfonso ug Tanza.

Taliwala niining tanan, walay pagpakabana si Marcos sa katalagmang nasinati sa katawhang Pilipino. Gitawag pa niyang “new normal” ug dili na kuno ekstra-ordinaryo ang grabeng lunop. Imbes nga sulbaron ang problema sa baha, nanghunaw ug nagpapogi siya sa iyang ika-upat nga State of the Nation Address. Giingnan niyag “kaulaw pud mo” ang mga upisyal sa gubyerno nga nakaganansya sa palpak nga proyekto sa pagkontrol sa baha. Iya pang gipanghinambog ang 9,856 nga nakumpletong flood control projects nga gigahinan og kapin tunga sa trilyong piso gikan 2022 nga wala mabati ang epekto.

Apan ang tinuod, siya mismo ang numero unong hinungdan sa pagkaguba sa kinaiyahan nga nagbunga og malukpanong pagbaha sa nasud. Padayon nga gitugutan sa rehimen ang operasyon ug pagtukod sa mga proyektong kumbersyon nga nagresulta dili masulbad nga kadaut sa lapad nga kayutaan ug kadagatan sa prubinsya.

Lakip sa maong mga proyekto ang 421-ektaryang Diamond Reclamation Project ug Bacoor Reclamation and Development Project sa Frabelle Fishing Corporation; konstruksyon sa dambuhalang Serin condominium estates ug Ayala malls sa mga Ayala sa bahaging Tagaytay; pagtukod og River Revetment Wall sa Sityo Pasipit, Barangay Tubuan 3, sa lungsod sa Silang; ang 3,500 ektaryang Villar City Project nga langkub ang bahin sa Barangay Salawag ug Barangay Paliparan sa Dasmariñas ug ang 11.7 kilometrong LRT-1 Cavite Extension sa upat ka barangay sa Bacoor. Bugti sa mga proyekto ang pagkaguba sa panginabuhian sa libu-libong katawhan sa Cavite ug malukpanong dislokasyon.

Nag-unang kakunsaba sa rehimen ang mga lokal nga burukrata-kapitalista ug pangpulitikang dinastiya nga naghari karon sa matag distrito sa prubinsya ug nagpahimulos sa mga mga proyekto sama sa mga pamilyang Tolentino, Barzaga, Revilla-Bautista ug Advincula.

Matud kang Simeon Magdiwang, tigpamaba sa NDF-Cavite, kinahanglang maghiusa ang pinakalapad nga han-ay sa katawhang Kabitenyo aron singlon ang rehimeng US-Marcos sa tanang krimen niini sa katawhang Pilipino. “Bugtong sa paggakos sa dalan ug programa sa nasudnon-demokratikong pakigbisog nga adunay sosyalistang perspektiba makab-ot ang tinuod nga kalamboan ug kausaban. Ang pagbaktas sa maong dalan ang mahimong puhunan sa atong daghang kusog aron dalhon sa kadaugan ang atong rebolusyonaryong pakigbisog. Pinaagi lamang niini makab-ot ang mahayag nga kaugmaon sa katawhan,” pamahayag ni Ka Simeon.