Lakip sa mga gipanghinambog ni Ferdinand Marcos Jr sa iyang SONA ang deklarasyon nga “wala nay grupong gerilya sa nasud.” Usa kini ka dakung bakak ug pagpanglingla lamang ilabina nga nakalahutay ug nakahiagum sa lalum ug lapad nga suporta sa katawhan sa kabanikanhan ang Bagong Hukbong Bayan (BHB) ug rebolusyonaryong kalihukan.

Matud sa Partido Komunista ng Pilipinas (PKP), sugod niadtong 2017 dungan sa pagpatuman sa Armed Forces of the Philippines (AFP) sa bangis ug brutal nga kampanyang pagpukan, subli nang gipahapsay ug gideploy ang mga yunit gerilya sa BHB aron labaw pang palalumon ug palapdon ang pag-ugat niini sa katawhan. Padayon karon nagatunhay ang usa ka bag-ong henerasyon sa mga batang Pulang manggugubat gikan sa han-ay sa mga mamumuo, mag-uuma, ug intelektwal nga petiburges, ayon sa Partido.

Ginaasdang sa mga Pulang manggugubat sa BHB ang armadong rebolusyon nga may mas lig-ong determinasyon nga tumanon ang kalihukang pagtul-id nga gipanawagan sa Partido alang sa subling pagpakusog sa armadong pakigbisog sa kabanikanhan.

Gawas dinhi, dayag nga gisukwahi sa kaugalingong mga lakang ni Marcos ang iyang mga pamahayag nga wala nay grupong gerilya sa nasud. Atubangan sa balik-balik nga pag-anunsyo sa AFP nga magpokus na kini sa “eksternal nga depensa,” mayorya pa gihapon sa mga batalyong pangkombat niini ang nakadeploy batok sa mga natarang gerilya sa BHB sa tibuok nasud. Gani, dili malimod bisan sa mga taho sa AFP ang gakabalita nga mga engkwentro sa mga yunit sa BHB sa mga prubinsya sa milabayng mga bulan.

Matud ni Marco Valbuena, chief information officer sa Partido, ang maong engrandeng deklarasyon ni Marcos mobusikad sa iyang nawong. Taliwala sa tanang gamhanang armas nga ginahatag sa US sa rehimeng Marcos pakyas ug mapakyas kining pugngan ang padayon nga subling paglambo ug paglapad sa BHB, nga pabiling lalum nga nakaugat sa katawhan.

“Tungod sa papet, pasista ug korap nga rehimeng Marcos, padayon nga tabunok ang yuta alang sa armadong pakigbisog,” matud ni Valbuena.

Gawas dinhi, gisulti sa PKP nga ang deklarasyon ni Marcos daw deklarasyon sa pagpatay sa posibilidad sa pakignegosasyon pangkalinaw sa National Democratic Front of the Philippines (NDFP).

“Nagmagahi siya ug ang mga upisyal sa National Task Force (NTF)-Elcac nga mibalibad nga ilhon ug tubagon ang mga ugat sa armadong panagbangi,” sumala kay Valbuena.