Liboan ka Pilipino ang midagsang sa kadalanan niadtong Hulyo 28 sa Metro Manila ug mga prubinsya, bisan sa gawas sa nasud, aron ibutyag ang tinuod nga kahimtang sa katawhan ilalum sa tulo ka tuig nga pagpangulo sa rehimeng Marcos. Ang mga demonstrasyon, nga ginahimo matag tuig isip tubag sa State of the Nation Address (SONA) sa presidente nga naglingkod, gitawag karong tuiga nga SONA sa Pagpaningil.

Nagmartsa ang nagkalain-laing sektor ug grupo sa Commonwealth Avenue, Quezon City padulong sa House of Representatives sa Batasan Hills nga gipangulohan sa Bagong Alyansang Makabayan (Bayan). Sama sa nangagi, gipugngan sa liboan ka pulis ang martsa maong napugos ang mga grupo nga ilunsad ang programa pila ka kilometro ang gilay-on gikan sa Batasan.

Sumala sa Bayan, ang SONA sa Pagpaningil mao ang lehitimo ug demokratikong tubag sa katawhan batok sa pagpahimulos ug pagpangdaugdaug nga ginapatuman sa rehimeng US-Marcos.

Gihatagag duut sa demonstrasyon ang pagka-inutil sa rehimen sa pagtubag sa epekto sa bag-ong mga bagyo ug hanging habagat nga nagdala og kusog nga ulan ug pagbaha. Gisaway usab nila ang nagkalain-laing babag nga gipahamtang sa mga institusyon sa estado, sama sa Korte Suprema, nga nagdiskaril sa pagtaral sa kaso sa impeachment batok sa bise presidente nga si Sara Duterte.

Gikundena usab sa protesta ang labaw pang konsolidasyon sa pulitikanhong gahum sa rehimeng Marcos sa miaging mga tuig pinaagi sa pag-uyon sa mga dikta sa imperyalismong US sa ekonomiya, palisiyang panggawas, ug nasudnong seguridad. Gisaway usab nila ang nagpadayon nga mga malupigong palisiya sama sa Anti-Terrorism Law, National Task Force-Elcac, National Action Plan for Unity, Peace and Development, ug bisan ang “gubat sa droga” sa kanhi rehimeng Duterte.

Misalmot usab sa demonstrasyon ang mga nasudnon-demokratikong grupo gikan sa Southern Tagalog ug Central Luzon.

Sa wala pa ang mismong adlaw sa SONA, nagpahigayon ang mga organisasyon og protesta sa nagkalain-laing ahensya sa rehimeng Marcos aron singlon ug panubagon sa ilang pagpasagad ug dunot nga serbisyo.

Halos 1,000 katawo usab ang misalmot sa protesta sa Iloilo City. Gikasa usab ang mga protesta sa Naga City sa Camarines Sur, Roxas City sa Capiz, Kalibo sa Aklan, Bacolod City, Cebu City, Tacloban City ug Davao City. Sa laing bahin, usa ka forum ang gipahigayon sa Baguio City niadtong Hulyo 27.

Sa gawas sa Pilipinas, nagpahigayon og mga demonstrasyon sa Hong Kong, South Korea, New Zealand, Australia, mga estado sa US, Canada, Netherlands, Germany ug United Kingdom. Kadaghanan sa mga aktibidad gipahigayon atubangan sa mga konsulado sa Pilipinas aron ipadayag sa gubyerno ang ilang mga reklamo.

Walay sulod nga SONA

Sama sa gilauman, walay sulod nga makahuluganong taho ug mga palisiya nga makapauswag sa kahimtang sa Pilipinas ang pamulong ni Marcos. Pulos pangpaanyag nga mga proyekto ang iyang gipangyawyaw, nanghinambog sa ₱20/kilong bugas nga ginabaligya sa pipila ka tindahan, ug uban pa.

Para sa katawhan, walay sulod ang deklarasyon ni Marcos batok sa korapsyon ilabina nga nagtunhay pa gihapon ang iyang binilyong pisong confidential funds. Lakip usab dinhi ang pagpugong niya sa pagpadayon sa kaso sa impeachment batok kang Duterte.

Peke nga gibatikos ni Marcos ang mga upisyal sa gubyerno tungod sa hinay nga pagpatuman sa mga proyekto para sa makontrol ang baha nga korapsyon ang hinungdan. Sa tinuod, labawng napuno sa korapsyon ang mga proyekto, si Marcos ang nag-unang katalagman tungod kay iyang gitugotan ang magun-ubong kwari, dredging, ug mga reklamasyon sa dagkung negosyo sa mga burukrata-kapitalista.

Walay sulod ang mga proyekto nga iyang giingon alang sa kahimsog, edukasyon, ug uban pang katilingbanong serbisyo. Daghang mahinungdanong isyu ang wala niya nalambigit sama sa dugang nga suhulan sa mga mamumuo, yuta para sa mga mag-uuma, ug uban pa.