Sa duso sa mga organisasyong Pilipino, nalunsad ang magkabulag nga imbestigasyon sa kahimtang sa mga migranteng Pilipino sa The Netherlands ug South Korea.

Niadtong Agosto 1, giimbestigahan sa Ministry of Employment and Labor sa South Korea ang wala paghatag sa suhol sa 91 ka Pilipinong mamumuo sa umahan sa Yanggu, Gangwon Province. Misulod ang mga migrante sa Korea pinaagi sa “seasonal worker program,” usa ka inisyatiba sa gubyerno nga nagtugot sa mga langyawng mamumuo nga magtrabaho sa nasud sa limitadong panahon aron tapalan ang malukpanong kakulang sa mga mamumuo matag tingtanum o ting-ani ug pagpangisda.

Sa The Netherlands, napanghingusog sa mga organisasyon ang pagimbestiga sa dili makitawhanong kundisyon sa pabrika kung asa nalambigit ang 11 ka migranteng Pilipino. Nagtrabaho sila isip mga tiglimpyo sa usa ka sikat nga branch sa mga gym alang sa adunahan ug mga artista nga Saints and Stars Gym sa Amsterdam. Matud sa gipasakang reklamo, ginapatrabaho sila, uban sa mga migranteng mamumuong Indonesian, sa tibuok semana nga sobra sa 12 oras kada adlaw. Gikuha sa superbisor ang ilang pasaporte ug adunay panahon nga wala sila gisuhulan. Nagdasok ang 11 sa upat ka gagmayng kwarto. Ang ilang kahimtang lapas sa Minimum Wage and Minimum Allowance Act ug Working Hours Act sa nasud. Walay permit aron magtrabaho ang mga migranteng mamumuo.

Giimbestigahan sa Labour Inspectorate ang kaso nga nagresulta sa pag-aresto sa Public Prosecution Service sa akawntant sa kumpanya sa posibleng kaso sa pagdoktor sa mga dokumento ug rekord sa kumpanya.

Naglunsad og kampanya ang Migrante Korea ug Bayan Europe aron ipanawagan ang hustisya alang sa mga migranteng Pilipino. Gawas dinhi, gisingil usab nila ang rehimeng US-Marcos nga nagpadayon sa labor export program.