An prubinsya han Cavite an usa ha mga linasurbo han bunok durot han bagyo nga Crising ngan habagat. Hadton Hulyo 22, igindeklara an state of calamity ha bug-os nga prubinsya.

Diri mamenos ha siyam nga bungto ngan munisipalidad han prubinsya an gin-apo. Ha Bacoor, 43 han 47 nga barangay an nahilista nga naapektuhan. Kadak-an han nangungukoy dinhi mga kablas-ha-syudad, trabahador ngan parupangisda. Bisan an dako nga engklabo sugad han Cavite Economic Zone (CEZ) diri talwas ha baha. Inabot ha 1,345 nga pamilya an igin-ebakwet tungod dinhi.

Aada ha 30,000 nga lokal nga parupangisda naman an naapektuhan an pakabuhi tungod kay diri makapalawod ha kusog han balud.

Gintatantiya nga aada ha ₱3.2 kamilyon an balor han nadestroso nga produkto ha agrikultura ha bungto han Alfonso, Naic, ngan Tanza. Nadestroso liwat an balor nga ₱1.5 kamilyon nga humay ha bungto han General Trias, Imus ngan Naic, ngan ₱407,500 nga mais ha bungto han Alfonso ngan Tanza.

Ha luyo hini ngatanan, waray labot la hi Marcos ha delubyo nga ginkakaatubang han katawhan Pilipino. Gintawag pa niya nga “new normal” ngan diri kuno ekstra-ordinaryo an grabe nga pagbaha. Imbes nga atubangon an problema ha pagbaha, pagdiwara ngan papogi hiya ha iya pamulong ha ika-upat nga State of the Nation Address. Ginsidngan niya nga “mahiya naman kayo” an mga upisyal han gubyerno nga naganansya ha palpak nga proyekto ha pagkontrol ha baha. Iginhihinambog pa niya an 9,856 nga nakumpleto nga flood control projects nga ginbuhusan han masobra katunga katrilyon kapisos tikang 2022 nga diri maabat an epekto.

Kundi an tinuod, hiya mismo an numero uno nga hinungdan han kadestroso han kalibungan nga nagdurot han hiluagan nga pagbaha ha nasud. Padayon nga gintutugutan han rehimen an operasyon ngan pagtitindog han mga proyekto nga kumbersyon nga nagreresulta ha diri na masosolbar nga destroso ha higluag nga katunaan ngan kadagatan ha prubinsya.

Kalakip hini nga mga proyekto an 421-kaektarya nga Diamond Reclamation Project ngan Bacoor Reclamation and Development Project han Frabelle Fishing Corporation; konstruksyon han higante nga Serin condominium estates ngan Ayala malls han mga Ayala ha parte han Tagaytay; pagtitindog han River Revetment Wall ha Sityo Pasipit, Barangay Tubuan 3, ha bungto han Silang; an 3,500 kaektarya nga Villar City Project nga lupgop an parte han Barangay Salawag ngan Barangay Paliparan ha Dasmariñas ngan an 11.7 kakilometro nga LRT-1 Cavite Extension ha upat nga barangay han Bacoor. Kabalyo hini nga mga proyekto an pagkaruba han pakabuhi han yukut-yukot nga katawhan ha Cavite ngan hiluagan nga dislokasyon.

Prinsipal nga ginkukunsabo han rehimen an mga lokal nga burukrata-kapitalista ngan pampulitika nga dinastiya nga naghahadi yana ha kada distrito han prubinsya ngan nagpupulos ha mga proyekto sugad han mga pamilya nga Tolentino, Barzaga, Revilla-Bautista ngan Advincula.

Sigon kan Simeon Magdiwang, tagapagyakan han NDF-Cavite, kinahanglan magkaurusa an pinakahiluag nga ranggo han katawhan Kabitenyo agud sukton an rehimen US-Marcos ha ngatanan nga krimen hini ha katawhan Pilipino. “Ha paghangkop gud la ha dalan ngan programa han nasyunal-demokratiko nga pakigbisog nga may sosyalista nga perspektiba naton makakab-ot an tinuod nga pag-uswag ngan pagbabag-o. An paghasog hini nga dalan an magigin puhunan han aton narunapulo kayukot nga kusog agud dad-on ha kadaugan an aton rebolusyunaryo nga pakigbisog. Hini gud la nga dalan naton makikit-an an malamrag nga kabubwason para ha katawhan,” pahayag ni Ka Simeon.