Hingpit nang gipatay sa Senado ang pagtaral kang bise presidente Sara Duterte sa mga artikulo sa impeachment nga iyang giatubang tungod sa pagpangawat ug korapsyon. Niadtong Agosto 6, mibotar ang 19 nga senador aron i-“arkibo” ang kaso isip pagsunod kuno sa desisyon nga gipagawas sa Korte Suprema niadtong Hulyo 25.

Sa desisyon sa korte, gideklara niining “di konstitusyunal” ang pagka-impeach kang Duterte tungod kay gilapas sa House of Representatives ang kaugalingon niining proseso sa impeachment. Giingon sa korte nga gilapas ang “usa ka tuig nga palugit” ayha subling magpasaka og kasong impeachment. Malukpanong gibatikos ang maong desisyon, bisan sa mga kanhing hukum sa Korte Suprema. Matud nila, nagsal-ot kini og mga bag-ong lakang sa proseso sa impeachment nga wala sa konstitusyon ug adunay pagpanhinumbra sa nahimong lakang sa korte. Nanawagan silang hinanali nga repasuhon sa korte ang desisyon.

Aron batikuson ang desisyon sa Senado ug Korte Suprema, naglunsad og mga demonstrasyon ang mga grupo sa pagpanguna sa Bagong Alyansang Makabayan. Matag adlaw silang nagprotesta gikan Agosto 5-7, ug niadtong Hulyo 26 ug 29.

Samtang, nagsumite og sulat ang alyansang Tama Na sa Korte Suprema niadtong Agosto 5 nga gipirmahan sa kapin 100 ka indibidwal gikan sa mga sektor sa edukasyon, kabatan-onan, panglawas, ug simbahan. Panawagan nila nga maghimo og oral argument aron makuha sa korte ang mga bag-ong panig nga maghatag dalan sa pagbaligtad sa desisyon niini.