Sukwahi sa gisulti ni Ferdinand Marcos Jr sa iyang ika-4 nga SONA nga “hapsay” ug “malinawon” na ang Pilipinas ug nga “wala nay grupong gerilya” sa nasud, walay hunong ang mga pagpamomba, pagpamatay ug pagpamig-ot sa mga pwersa sa militar ug pulis ngadto sa mga sibilyang komunidad ug nagasukol nga katawhan sa takuban sa kampanyang kontra-insurhensiya.

Pagpamomba. Kahadlok, troma ug kabalaka ang epekto sa pagpamomba ug pagpangistraping sa AFP sa mga sibilyang komunidad sa Northern Samar ug Quezon.

Pipila ka beses nga naghulog og bomba gikan sa ere ang 8th ID sa Barangay San Isidro, Las Navas, Northern Samar niadtong Hulyo 31, alas-2:30 sa kaadlawon. Ginasulti sa militar nga ginatarget sa maong pag-atake ang usa ka yunit sa hukbong bayan sa lugar, ingonman, grabe kining nakaapekto sa sibilyang populasyon. Human niini, gipailalum sa hamlet sa 8th ID ang Barangay San Isidro ug ang mga barangay nga nakapalibot dinhi lakip ang Barangay Imelda.

Sa Quezon, biktima sa pagpangistraping, pagpanganyon ug pagpamomba sa 16th IB ang Barangay Maguibuay, Tagkawayan niadtong Agosto 2. Duha ka helikopter ang nang-istraping aron kuno gukdon ang nakaengkwentrong usa ka yunit sa hukbong bayan niadtong tungura.

Pagpatay ug sulayng pagpatay. Gipusil-patay silang Rudolph Dela Cruz Espe ug Rico Gonzaga Malubay, mga tigpanalipud sa kinaiyahan ug katungod sa mga lumad, sa Banaybanay, Davao Oriental niadtong Hulyo 27. Pareho silang aktibong mibatok sa magun-ubong mina sa prubinsya tungod sa kadaut nga gibunga niini sa kinaiyahan ug panginabuhian sa katawhan. Nagsilbi usab silang mga paralegal sa mga abugado sa Ateneo de Davao University kaniadto.

Sa Occidental Mindoro, gidakop ug tinuyong gipatay sa mga sundalo sa 4th IB ang sibilyang si Juan Sumiling sa Sityo Salidang, Barangay Naibuan, San Jose niadtong Agosto 1. Ang biktima ginapagawas sa mga sundalo nga myembro sa hukbong bayan nga napatay sa usa ka engkwentro. Gipanghimakak kini sa National Democratic Front-Mindoro.

Sa General Santos City, grabeng nasamdan si Warren Cahayag, tigpanalipud sa tawhanong katungod, human gipusil sa makapila ka beses sa Purok Bliss, Barangay Calumpang niadtong Hulyo 28. Si Cahayag usa ka paralegal nga lakip sa nagtukod sa Union of Peoples’ Lawyers in Mindanao niadtong 2005.

Pagpamig-ot. Niadtong Hulyo 28, usa ka sundalo sa 17th IB ang nangutana kalabot kang Jacqueline Ratin, lider-pesante ug -kababayen-an sa Cagayan Valley, sa upisina sa barangay sa Gabut, Amulong, Cagayan. Subli siyang gitarget sa pagpamig-ot human mitabang sa pagdumala sa disaster relief operation sa prubinsya.

Sa Central Negros, gisaka ug gitoktok sa mga sundalo ang balay sa mga sibilyang residente sa Sityo Tagbak, Barangay Trinidad, Guihulngan City nga walay bisan unsang ligal nga dokumento niadtong Agosto 1. Ayha niini, iligal nga nagkampo ang mga sundalo sa balay sa usa ka sibilyan sa Sityo Sampungan, Barangay Macagahay, Negros Occidental niadtong Hulyo 26.