Ti prubinsya ti Cavite ti maysa kadagiti dinadael ti napigsa a buyat ti tudo nga intunda ti bagyo a Crising ken habagat. Idi Hulyo 22, naideklara ti state of calamity iti intero a prubinsya.

Saan a bumaba iti siyam a munisipalidad ti prubinsya ti limned iti layus. Idiay Bacoor, 43 iti 47 a barangay ti naimaldit a naapektaran. Kaadwan ti agindeg ditoy ket nakurapay iti syudad, mangmangged ken mangngalap. Uray ti dakkel nga engklabo kas ti Cavite Economic Zone (CEZ) ket saan a nakalisi iti layus. Dimmanon iti 1,345 a pamilya ti naibakwit gapu ditoy.

Mapatta-patta nga adda iti ₱3.2 milyon ti gatad ti naperdi a produkto iti agrikultura iti ili ti Alfonso, Naic ken Tanza. Nadadael met ti gatad a ₱1.5 milyon a pagay iti ili ti General Trias, Imus ken Naic ken ₱407,500 a mais iti ili ti Alfonso ken Tanza.

Iti laksid dagitoy, awan anyaman na ken Marcos ti didigra a sangsangwen ti umili a Pilipino. Inawagan na pay a “new normal” ken saan kano nga ekstraordinaryo ti nakaro a layus. Imbes a sangwen ti problema iti panaglayus, agindadalus ken agpagpagwapo isuna iti diskurso na iti maikapat nga State of the Nation Address. “Agbain kayo met!” ti kinuna na kadagiti upisyal ti gubyerno nga agganganansya kadagiti palpak a proyekto iti panangkontrol iti layus. Ilaslastog na pay ti 9,856 a nakumpleto a flood control projects a nabukbukan ti nasurok kagudwa a trilyon a piso manipud 2022 a saan met a marikna ti epekto na.

Ngem kinapudno na, isuna mismo ti numero uno a gapu ti pannakaperdi ti law-ang a nangitunda ti nasaknap a panaglayus iti pagilyan. Agtultuloy a palpalubosan ti rehimen ti operasyon ken panangitakder kadagiti proyekto a kumbersyon nga agresresulta iti saan a maagasan a dangran iti nalalawa a kadagaan ken kabaybayan iti prubinsya.

Kabilang kadagitoy a proyekto ti 421-ektarya a Diamond Reclamation Project ken Bacoor Reclamation and Development Project ti Frabelle Fishing Corporation; konstruksyon ti higante a Serin condominium estates ken Ayala malls dagiti Ayala iti paset ti Tagaytay; panangitakder ti River Revetment Wall iti Sityo Pasipit, Barangay Tubuan 3 iti ili ti Silang; ti 3,500 ektarya a Villar City Project a saklaw ti paset ti Barangay Salawag ken Barangay Paliparan iti Dasmariñas ken ti 11.7 kilometro nga LRT-1 Cavite Extension iti uppat a barangay ti Bacoor. Kasukat dagitoy a proyekto ti pannakaperdi ti pagbiagan ti rinibo nga umili idiay Cavite ken nasaknap a dislokasyon.

Kangrunaan a kakunkunsabos ti rehimen dagiti lokal a burukrata kapitalista ken dinastiya iti pulitika nga agar-ari tatta iti tunggal distrito ti prubinsya ken agnumnumar kadagiti proyekto kas kadagiti pamilya a Tolentino, Barzaga, Revilla-Bautista ken Advincula.

Segun ken Simeon Magdiwang, tagapagsarita ti NDF-Cavite, kasapulan nga agkaykaysa ti kalawaan nga intar ti umili a Kabitenyo tapno singiren ti rehimen US-Marcos iti amin a krimen daytoy iti umili a Pilipino. “Iti laeng panangarakup iti dana ken programa ti nailyan-demokratiko a dangadang nga addaan sosyalista a perspektiba tayo a magun-od ti pudno a panagdur-as ken panagbalbaliw. Ti panangdalyasat iti daytoy a dana ti agbalin a puonan ti rinibribo a pigsa tapno ipagballigi ti rebolusyonaryo a dangadang. Ditoy laeng a dana a makita ti nalawag a masakbayan para iti umili.”pablaak ni Ka Simeon.