Ang probinsya sang Cavite ang isa sa mga naigo sang mabaskog nga bubo sang ulan tuga sang bagyong Crising kag habagat. Sadtong Hulyo 22, gindeklarar ang state of calamity sa bilog nga probinsya.

Indi magnubo sa siyam ka banwa kag munisipalidad sang probinsya ang nalumos sa baha. Sa Bacoor, 43 sang 47 ka barangay ang nalista nga naapektuhan. Kalabanan sang nagapuyo diri ang mga imol nga taga-syudad, mamumugon kag mangingisda. Bisan ang dako nga engklabo pareho sang Cavite Economic Zone (CEZ) ang indi luwas sa baha. Naglab-ot sa 1,345 nga pamilya ang ginbakwit tungod diri.

Yara sa 30,000 ka lokal nga mangingisda naman ang naapektuhan ang palangabuhian tungod indi makapalawod sa kabaskog sang balod.

Ginabulubanta nga yara sa ₱3.2 milyon ang kantidad sang naguba nga produkto sa agrikultura sa banwa sang Alfonso, Naic, kag Tanza. Naguba man ang ₱1.5 milyon nga bili sang humay sa banwa sang General Trias, Imus kag Naic, kag ₱407,500 nga mais sa banwa sang Alfonso kag Tanza.

Sa pihak sini tanan, nagapawala lang si Marcos sa delubyo nga gina-atubang sang pumuluyong Pilipino. Gintawag pa niya nga “new normal” kag indi na kuno ekstra-ordinaryo ang malala nga pagbaha. Sa baylo nga atubangon ang problema sa pagbaha, hugas-kamot kag pagwapo siya sa iya pamulong-pulong sa ika-apat nga State of the Nation Address. Ginhambalan niya nga “mahuya man kamo” ang mga upisyal sang gubyerno nga nagaganar halin sa palpak nga proyekto sa pagkontrol sang baha. Ginapadayaw pa niya ang 9,856 nga nakumpleto nga flood control projects nga ginbubuan sang masobra tunga ka trilyon ka piso halin sang 2022 nga indi mabatyagan nga epekto.

Apang ang matuod, siya mismo ang numero uno nga kabangdanan sang pagkaguba sang kapalibutan nga nagtuga sang lapnagon nga pagbaha sa pungsod. Padayon nga ginatugutan sang rehimen ang operasyon kag pagtukod sang mga proyekto nga kumbersyon nga nagaresulta sa indi masolbar nga kahalitan sa malapad nga kadutaan kag kadagatan sang probinsya.

Lakip sa mga proyekto nga ini ang 421-ektarya nga Diamond Reclamation Project kag Bacoor Reclamation and Development Project sang Frabelle Fishing Corporation; konstruksyon sang dalagko nga Serin condominium estates kag Ayala malls sang mga Ayala sa bahin sang Tagaytay; pagtukod sang River Revetment Wall sa Sityo Pasipit, Barangay Tubuan 3, sa banwa sang Silang; ang 3,500 ektarya nga Villar City Project nga sakop ang bahin sang Barangay Salawag kag Barangay Paliparan sa Dasmariñas kag ang 11.7 kilometro nga LRT-1 Cavite Extension sa apat ka barangay sang Bacoor. Kabaylo sang mga proyekto nga ini ang pagkawasak sang palangabuhian sang linibo ka pumuluyo sa Cavite kag lapnagon nga dislokasyon.

Nagapanguna nga kahimbon sang rehimen ang mga lokal nga burukrata-kapitalista kag pampulitika nga dinastiya nga nagahari subong sa tagsa ka distrito sang probinsya kag nagapanginpulos sa mga proyekto pareho sang mga pamilya Tolentino, Barzaga, Revilla-Bautista kag Advincula.

Suno kay Simeon Magdiwang, tigpamaba sang NDF-Cavite, dapat mag-ugyon ang pinakamalapad nga kubay sang pumuluyong Kabitenyo para sukton ang rehimen US-Marcos sa tanan nga krimen sini sa pumuluyong Pilipino. “Solo nga sa paghakos sa banas kag programa sang pungsodnon-demokratiko nga paghimakas nga may sosyalistang perspektiba naton maangkon ang matuod nga pag-uswag kag pagbag-o. Ang pag-usoy sa banas nga ini ang mangin puhunan sang aton linaksa nga kusog agud dalhon sa kadalag-an ang aton rebolusyonaryong paghimakas. Sa banas lang nga ini naton makit-an ang masanag nga palaabuton para sa katawhan,” pahayag ni Ka Simeon.