Lubos na nga ginpatay sang Senado ang paghukom kay bise presidente Sara Duterte sa mga artikulo sang impeachment nga gina-atubang niya tungod sa anomaliya kag korapsyon. Sadtong Agosto 6, nagboto ang 19 ka senador para i-“arkibo” ang kaso bilang pagsunod kuno sa desisyon nga ginpagwa sang Korte Suprema sadtong Hulyo 25.

Sa desisyon sang korte, gindeklarar sini nga “indi konstitusyunal” ang pagka-impeach kay Duterte tungod ginlapas sini sang House of Representatives ang kaugalingon nga proseso sa impeachment. Ginhambal sang korte nga ginlapas ang “isa ka tuig nga plaso” bag-o liwat magpasaka sang kaso sang impeachment. Nag-ani sang wala-tuo nga pagbatikos ang desisyon, lakip halin sa anay mga mahistrado sang Korte Suprema. Suno sa ila, nagpasulod man ini sang mga bag-o nga tikang sa proseso sang impeachment nga wala sa konstitusyon kag may pagsinobra sa nangin tikang sang korte. Nagpanawagan sila nga gilayon nga repasuhon sang korte ang desisyon.

Para batikuson ang desisyon sang Senado kag Korte Suprema, naglunsar sang mga demonstrasyon ang mga grupo sa pagpanguna sang Bagong alyansang Makabayan. Adlaw-adlaw sila nga nagprotesta halin Agosto 5-7, kag sadtong Hulyo 26 kag 29.

Samtang, nagpasaka sang sulat ang alyansa nga Tama Na sa Korte Suprema sadtong Agosto 5 nga ginpirmahan sang masobra 100 ka indibidwal halin sa mga sektor sang edukasyon, pamatan-on, ikaayong-lawas, kag simbahan. Panawagan nila nga magpatigayon sang oral argument para makuha sang korte ang mga bag-o nga bahin nga magahatag-dalan sa pagbaliskad sang desisyon sini.