Naglayon a pinatayen ti Senado ti panagdengngeg ken bise presidente Sara Duterte kadagiti artikulo ti impeachment a sangsangwen na gapu iti kunniber ken korapsyon. Idi Agosto 6, nagbotos ti 19 a senador tapno i-“arkibo” wenno idulin ti kaso kas panangsurot kano iti desisyon nga inruar ti Korte Suprema idi Hulyo 25.

Iti desisyon ti korte, indeklara daytoy a “saan a konstitusyunal” ti panang-impeach ken Duterte gapu ta linabsing ti House of Representatives ti bukod daytoy a proseso iti impeachment. Imbaga ti korte a nalabsing ti “maysa a tawen a palugit” sakbay a balbaliw nga agipila ti kaso ti impeachment. Ti desisyon ket naglak-am ti agsusumbangir a pammabalaw, kabilang dagiti dati a mahistrado ti Korte Suprema. Kunada, nagiserrek met daytoy kadagiti baro nga addang iti proseso ti impeachment nga awan iti konstitusyon ken adda ti panagabuso iti nagbalin nga addang ti korte. Immawag da a dagus a repaswen ti korte ti desisyon.

Tapno babalawen ti desisyon ti Senado ken Korte Suprema, nagisayangkat kadagiti demonstrasyon dagiti grupo iti panangiyuna ti Bagong Alyansang Makabayan. Inaldaw da a nagprotesta manipud Agosto 5-7 ken idi Hulyo 26 ken 29.

Kabayatanna, nagipila ti surat iti Korte Suprema ti alyansa a Tama Na idi Agosto 5 a pinirmaan ti nasurok 100 indibidwaal manipud kadagiti sektor ti edukasyon, kabataan, salun-at ken simbaan. Ti awag da ket agiyaramid ti oral argument tapno maala ti korte dagiti baro a benneg a mangted dalan iti panangbaliktad iti desisyon daytoy.