Hul-os na nga ginpatay han Senado an pagbista kan bise presidente Sara Duterte ha mga artikulo han impeachment nga ginkakaatubang niya tungod ha anomaliya ngan korapsyon. Hadton Agosto 6, binotos an 19 nga senador agud ig-“arkibo” an kaso komo pag-alagad kuno ha desisyon nga igin-gawas han Korte Suprema hadton Hulyo 25.

Ha desisyon han korte, igindeklara hini nga “diri konstitusyunal” an pagkaka-impeach kan Duterte tungod kay gintalapas han House of Representatives an kalugaringon hini nga proseso ha impeachment. Ginsering han korte nga gintalapas an “usa katuig nga limitasyon” antes utro nga magsalawad han kaso nga impeachment. Umani hin paluyu-luyo nga pagsukna an desisyon, kalakip an tikang ha hadto anay mga mahistrado han Korte Suprema. Sering nira, nagpasulod liwat ini hin mga bag-o nga pitad ha proseso han impeachment nga waray ha konstitusyon ngan may pagsosobra ha nagin pitad han korte. Nanawagan hira nga rebyuhon ha gilayon han korte an desisyon.

Agud suknaon an desisyon han Senado ngan Korte Suprema, naglansar hin mga demonstrasyon an mga grupo ha pangunguna han Bagong Alyansang Makabayan. Kada adlaw hira nagprotesta tikang Agosto 5-7, ngan hadton Hulyo 26 ngan 29.

Samtang, nagpadangat hin surat an alyansa nga Tama Na ha Korte Suprema hadton Agosto 5 nga ginpirmahan han masobra 100 nga indibidwal tikang ha mga sektor han edukasyon, kabatan-unan, kalibsugan, ngan singbahan. Panawagan nira nga maghimo hin oral argument (lantugiay) agud makuha han korte an mga bag-o nga gapil nga mahagudalan ha pagbawi han desisyon hini.