Kalakip ha mga iginhambog ni Ferdinand Marcos Jr ha iya SONA an deklarasyon nga “waray na gerilya nga grupo ha nasud.” Usa ini nga buwa ngan hul-os nga panguwat labina nga nakakagpursige ngan nakatatagamtam han hilarum ngan hiluag nga suporta han katawhan ha kabaryuhan an Bagong Hukbong Bayan (BHB) ngan rebolusyunaryo nga kagiusan.

Sigon ha Partido Komunista ng Pilipinas (PKP), tikang hadton 2017 kadungan han pagpapatuman han ginpapintas ngan brutal nga kampanya nga paglipol han Armed Forces of the Philippines (AFP) utro na nga gin-aayad ngan igindeploy an mga yunit gerilya han BHB agud dugang pa nga pahilarumon ngan pahiluagon an paggamot hini ha katawhan. Padayon yana nga nalutaw an usa nga bag-o nga henerasyon han mga batan-on nga Pula nga mangaraway tikang ha ranggo han mga trabahador, parag-uma, ngan intelektwal nga petiburges, sigon ha Partido.

Iginpapasulong han mga Pula nga mangaraway han BHB an armado nga rebolusyon hin may labaw nga madig-on nga determinasyon nga tumanon an kagiusan pagtutul-id nga ginpanawagan han Partido para ha utro nga pagpapakusog ha armado nga pakig-away ha kabaryuhan.

Labot dinhi, direkta nga gintitipahan han kalugaringon nga mga pitad ni Marcos an iya mga pahayag nga waray na gerilya nga grupo ha nasud. Atubangan han pauru-utro nga pag-aanunsyo han AFP nga mapokus na ini ha “eksternal nga depensa,” mayoriya pa gihapon ha mga pankombat nga batalyon hini an nakadeploy kontra ha mga prente gerilya han BHB ha bug-os nga nasud. Ngani, paluyu-luyo pa gihapon an iginrereport bisan han AFP nga mga engkwentro ha mga yunit han BHB ha mga prubinsya ha naglabay nga mga bulan.

Sigon kan Marco Valbuena, puno nga upisyal ha impormasyon han Partido, ini nga engrande nga deklarasyon ni Marcos mabuto ha iya nawong. Ha luyo han ngatanan nga magbakod nga armas nga iginhahatag han US ha rehimen Marcos pakyas ngan mapapakyas ini nga pugngan an padayon nga utro nga pagrabong ngan paghiluag han BHB, nga nagpapabilin nga hilarum nga nakagamot ha katawhan.

“Tungod ha papet, pasista ngan korap nga rehimen ni Marcos, padayon nga nagtatambok an tuna para ha armado nga pakig-away,” sering ni Valbuena.

Labot dinhi, ginsering han PKP nga an deklarasyon ni Marcos katugbang han deklarasyon han pagpatay ha posibilidad han pakig-erestorya pankamurayawan ha National Democratic Front of the Philippines (NDFP).

“Nag-iinsister hiya ngan an mga upisyal han National Task Force (NTF)-Elcac nga diri kilal-on ngan batunon an mga gamot han armado nga sumpakiay,” sigon kan Valbuena.