Lakip sa ginapabugal ni Ferdinand Marcos Jr sa iya nga SONA ang deklarasyon nga “wala na sang grupong gerilya sa pungsod.” Isa ini ka kabutigan kag puro pagpaniplang ilabi na kay madinalag-on kag nagaangkon sang madalom kag malapad nga suporta sang pumuluyo sa kabukiran ang Bagong Hukbong Bayan (BHB) kag rebolusyonaryong kahublagan.

Suno sa Partido Komunista ng Pilipinas (PKP), sugod sadtong 2017 kadungan sa pagpatuman sang ginpabagsik kag brutal nga kampanyang pangdugmok sang Armed Forces of the Philippines (AFP) liwat nga gin-ayos kag ginpakat ang mga yunit gerilya sang BHB agud labi pa nga padalumon kag palaparon ang pag-ugat sini sa pumuluyo. Padayon subong nga nagatuhaw ang isa ka bag-o nga henerasyon sang mga batan-on nga Pulang hangaway halin sa kubay sang mga mamumugon, mangunguma, kag intelektwal nga petiburges, suno sa Partido.

Ginasulong sang mga Pulang hangaway sang BHB ang armadong rebolusyon nga may mas malig-on nga determinasyon nga tumanon ang kahublagan panadlong nga ginpanawagan sang Partido para sa liwat nga pagpabaskog sa armadong paghimakas sa kabukiran.

Magluwas diri, direkta nga ginabangga sang kaugalingon nga mga tikang ni Marcos ang iya mga pahayag nga wala na sang grupong gerilya sa pungsod. Sa atubang sang pasulit-sulit nga pag-anunsyo sang AFP nga pagatutukan na sini ang “eksternal nga depensa,” mayoriya pa gihapon sa mga batalyon pangkombat sini ang ginbutang batuk sa mga larangan gerilya sang BHB sa bilog nga pungsod. Sa kamatuoran, wala-tuo pa sa gihapon ang ginareport bisan sang AFP nga mga engkwentro sa mga yunit sang BHB sa mga probinsya sa nagligad nga mga binulan.

Suno kay Marco Valbuena, pamuno nga upisyal sa impormasyon sang Partido, ang engrande nga deklarasyon nga ini ni Marcos ang magalupok sa iya nawong. Sa pihak sang tanan nga gamhanan nga armas nga ginahatag sang US sa rehimen Marcos napaslaw kag mapaslawan ini nga punggan ang padayon nga liwat pag-uswag kag paglapad sang BHB, nga nagapabilin nga madalom nga naka-ugat sa pumuluyo.

“Tungod sa papet, pasista kag korap nga rehimen ni Marcos, padayon nga nagatambok ang duta para sa armadong paghimakas,” suno kay Valbuena.

Magluwas diri, ginhambal sang PKP nga ang deklarasyon ni Marcos ang katumbas sang deklarasyon sang pagpatay sa posibilidad sang hinun-anon pangkalinong sa National Democratic front of the Philippines.

“Nagapakatig-a siya kag ang mga upisyal sang National task Force (NTF)-Elcac nga nagpamalibad nga kilalahon kag sabton ang mga gamot sang armadong banggianay,” suno kay Valbuena.