jKabilang kadagiti inpalastog ni Ferdinand Marcos Jr iti SONA ti deklarasyon nga “awanen ti grupo a gerilya iti pagilyan.” Maysa daytoy a kinaulbod a puro panangloko nangruna ta agpurpursigi ken makagungun-od ti nauneg ken nalawa a suporta ti umili iti kaaw-awayan ti New People’s Army (NPA) ken rebolusyonaryo a tignay.

Segun iti Communist Party of the Philippines (CPP), manipud idi 2017 kagiddan ti panagipatungpal ti pinarungsot ken brutal a kampanya ti panagrebbek ti Armed Forces of the Philippines (AFP) ket balbaliwen nga insimpa ken naipakat dagiti yunit gerilya ti NPA tapno ad-adda pay a paunegen ken palawaen ti panagramut daytoy iti umili. Agtultuloy tatta a rumrumwar ti maysa a baro a henerasyon dagiti agkabanwag a Nalabbaga a mannakigubat manipud iti intar dagiti mangmangged, mannalon ken intelektwal a petiburges, segun iti Partido.

Iyab-abante dagiti Nalabbaga a mannakigubat ti NPA ti armado a rebolusyon nga addaan natibtibker a determinasyon tapno tungpalen ti tignay panagilinteg nga inyawag ti Partido para iti balbaliw a panangpapigsa iti armado a dangadang iti kaaw-awayan.

Malaksid ditoy, direkta a salsalungasingen dagiti bukod nga addang ni Marcos dagiti pablaak na nga awanen ti grupo a gerilya iti pagilyan. Iti sango ti paulit-ulit a panagiyanunsyo ti AFP nga agtalmegen iti “eksternal a depensa,” mayorya pay laeng kadagiti batalyon a pangkombat daytoy ti nakapakat laban kadagiti larangan gerilya ti NPA iti intero a pagilyan. Kinapudno na, agsusumbangir latta ti maiyul-ulat uray ti AFP nga engkwentro kadagiti yunit ti NPA kadagiti prubinsya iti napalabas a bulan.

Segun ken Marco Valbuena, dadaulo nga upisyal iti impormasyon ti Partido, daytoy nga enggrande a deklarasyon ni Marcos ket bumtak iti rupa na. Iti laksid ti amin a nabibileg nga armas nga it-ited ti US iti rehimen Marcos ket napaay ken mapaay daytoy a lapdan ti agtultuloy a balbaliw a panaglangto ken panaglawa ti NPA, nga agtaltalinaed a nauneg a nakaramut iti umili.

“Gapu iti aso-aso, pasista ken korap a rehimen ni Marcos, agtultuloy a dumamdam-eg ti daga para iti armado a dangadang,” kuna ni Valbuena.

Malaksid ditoy, kuna ti CPP a ti deklarasyon ni Marcos ket kabatog ti deklarasyon ti panangpatay iti posibilidad ti saritaan iti kapya iti National Democratic Front of the Philippines (NDFP).

“Agpatpatangken isuna ken dagiti upisyal ti National Task Force (NTF)-Elcac nga agkedked ken sungbatan dagiti ramut ti armado a risisris,” segun ken Valbuena.