Disbar Duterte! Nagsalawad hin reklamo nga disbarment o pagtanggal komo abugado kontra kan hadto anay presidente Rodrigo Duterte ha Korte Suprema an mga biktima han iya kampanya han panmatay ngan panmuypoy hadton Enero 17. Kaupod ha 17 nga nagsalawad han reklamo hira Atty. VJ Topacio, anak han ginpatay nga mag-asawa nga rebolusyunaryo nga hira Eugenia Magpantay ngan Agaton Topacio, hi Liezel Asuncion, asawa han ginpatay nga lider-aktibista nga hi Manny Asuncion, ngan hi Llore Pasco, iroy han duha nga ginpatay ha “gerra kontra druga.”

Umento ha matrikula ha UST ngan NTC, gintipahan. Nagprotesta an mga estudyante han University of Sto. Tomas (UST) ha kampus hini ha Manila hadton Enero 14 agud suknaon an tuition and other fees increase (TOFI) ha unibersidad. Ginpangunahan an paggios han mga nasyunal-demokratiko nga grupo ha sakob han UST. Hadton naglabay nga akademiko nga tuig ha UST, inabot ha 6% an umento ha matrikula, ngan para ha akademiko nga tuig han 2023-2024 naatubang an mga estudyante ha umento nga maabot ha 4%-10% depende ha kolehiyo.

Ha National Teachers College ha Manila, masobra 100 nga estudyante an nagpirma ha petisyon nga ginpangunahan han Ayokong Magmahal-NTC agud tipahan an namamangpangan nga TOFI. Ginhimo an aktibidad kadungan han “konsultasyon” hadton Enero 16 hiunong ha ginpoproponer nga umento han matrikula han NTC.

Plano nga umento-ha-pasahe ha LRT, ginsukna. Gintapo hin protesta han mga kabatan-unan ngan estudyante an syahan nga biyahe han LRT 1-Doroteo Jose Station ha Sta. Cruz, Manila hadton aga han Enero 15. Gintipahan nira an plano nga ₱15 maksimum nga umento-ha-pasahe nga ginduduso han Light Rail Manila Corporation, an kompaniya nga nagpapadalagan ha serbisyo han LRT ha Metro Manila. Hadton Enero 9, tinambong an mga tinaglawas han mga progresibo nga organisasyon ha pampubliko nga pagbista hiunong ha umento-ha-pasahe nga ginhimo han Department of Transportation. Ginpahayag nira dinhi an ira hugot nga pagtipa.

Welga ha Handyman. Naglansar hin welga hadton Enero 6 an mga trabahador han Handyman-True Value-Pet Lovers Empowered Workers Union ha prinsipal nga depot (bodega) han Handyman ha Manila Bay Spinning Mills Compound ha Marikina City. Naduso hira nga bumalhin ngan tukuron an piket ha hedkwarters han Robinsons Retail Holdings Inc, (RRHI) tag-iya han Handyman ha Quezon City tungod ha iligal nga pagbungkag ha ira welga. Baton ini han unyon ha iligal nga pananggal ha diri mamenos ha 122 nga trabahador hadton Nobyembre 2024. Gintanggal hira han RRHI tungod ha pag-undong ha ira unyon.