Disbar Duterte! Nagsang-at og reklamong disbarment o pagtangtang isip abogado batok kang kanhing presidente Rodrigo Duterte sa Korte Suprema ang mga biktima sa iyang kampanya sa pagpamatay ug pagpanumpo niadtong Enero 17. Lakip sa 17 nga nagpasaka og reklamo sila Atty. VJ Topacio, anak sa gipatay nga mag-asawang rebolusyonaryo nga sila Eugenia Magpantay ug Agaton Topacio; si Liezel Asuncion, asawa sa gipatay nga lider-aktibistang si Manny Asuncion; ug si Llore Pasco, inahan sa duha ka gipatay sa “gyera kontra droga.”

Pagtaas sa Matrikula sa UST ug NTC, gibabagan. Nagprotesta ang mga estudyante sa University of Sto. Tomas (UST) sa kampus niini sa Manila niadtong Enero 14 aron batukan ang pagtaas sa tuition and other fees increase (TOFI) sa unibersidad. Gipasiugdahan ang protesta sa nasudnon-demokratikong grupo sulod sa UST. Niadtong miaging akademikong tuig sa UST, miabot sa 6% ang pagsaka sa matrikula, ug nag-atubang ang mga estudyante og 4%-10% nga pagtaas depende sa kolehiyo alang sa akademikong tuig 2023-2024.

Sa National Teachers College (NTC) sa Maynila, labaw pa sa 100 ka estudyante ang mipirma sa petisyon nga pinangunahan sa Ayokong Magmahal NTC aron babagan ang planong TOFI. Gipahigayon ang aktibidad dungan sa “konsultasyon” niadtong Enero 16 mahitungod sa sugyot nga pagsaka sa matrikula sa NTC.

Planong dugang-plete sa LRT, gibatukan. Gisugat og protesta gikan sa mga kabatan-onan ug estudyante ang unang byahe sa LRT-1 Doroteo Jose Station sa Sta. Cruz, Manila niadtong buntag sa Enero 15. Gibatukan nila ang planong ₱15 nga maksimum nga dugang-plete nga ginaduso sa Light Rail Manila Corporation, ang kumpanyang nagdumala sa serbisyong LRT sa Metro Manila. Niadtong Enero 9, mitambong ang mga representante gikan sa mga progresibong organisasyon sa pangpublikong pagdungog bahin sa taas-pasahe nga gihimo sa Department of Transportation. Ilang gipadayag dinhi ang grabeng pagsupak.

Welga sa Handyman. Nagkasa og welga niadtong Enero 6 ang mga mamumuo gikan Handyman-True Value-Pet Lovers Empowered Workers Union sa mayor nga depot o bodega sa Handyman sa Manila Bay Spinning Mills Compound sa Marikina City. Natukmod silang mobalhin ug itukod ang piket sa headquarters sa Robinsons Retail Holdings Inc (RRHI), tag-iya sa Handyman sa Quezon City tungod sa iligal nga pagbungkad sa ilang welga. Tubag kini sa unyon ngadto sa iligal nga pagpanangtang ngadto sa dili moubos 122 ka mamumuo niadtong Nobyembre 2024. Gitangtang sila sa RRHI tungod sa pagdumala sa ilang unyon.