Disbar Duterte! Nagpasaka sang reklamo nga disbarment ukon pagkakas isip abogado batuk kay anay Presidente Rodrigo Duterte sa Korte Suprema ang mga biktima sang iya nga kampanya sang pagpatay kag pagpanumpo sadtong Enero 17. Kabahin sa 17 nga nagpasaka sang reklamo sila ni Atty. VJ Topacio, si Liezel Asuncion, asawa sang lider-aktibista nga ginpatay nga si Manny Asuncion kag Llore Pasco, iloy sang duha ka ginpatay sa “gyera kontra druga.”

Pagtaas sang matrikula sa UST kag NTC, ginpamatukan. Nagprotesta ang mga estudyante sang University of Sto. Tomas (UST) sa kampus sini sa Manila sadtong Enero 14 para sawayon ang tuition and other fees increase (TOFI) sa unibersidad. Ginpangunahan ang hublag sang pungsodnon-demokratiko nga grupo sa sulod sang UST. Sadtong nagligad nga akademiko nga tuig sa UST, naglab-ot sa 6% ang pagsaka sang matrikula, kag para sa akademiko nga tuig sang 2023-2024 nakapangatubang ang mga estudyante sa pagtaas nga naglab-ot sa 4%-10% depende sa kolehiyo.

Sa National Teachers College sa Manila, masobra 100 estudyante ang nagpirma sa petisyon nga ginpangunahan sang Ayokong Magmahal NTC agud pamatukan ang nagahana nga TOFI. Ginlunsar ang aktibidad kadungan sang “konsultasyon” sadtong Enero 16 angot sa sugyot nga pagtaas sang matrikula sang NTC.

Plano nga taas-plete sa LRT, ginsaway. Ginsugata sang protesta sang mga pamatan-on kag estudyante ang una nga byahe sang LRT-1 Doroteo Jose Station sa Sta. Cruz, Manila sadtong aga sang Enero 15. Ginpamatukan nila ang plano nga ₱15 maksimum nga taas-plete nga ginaduso sang Light Rail Manila Corporation, ang kumpanya nga nagapadalagan sa serbisyo nga LRT sa Metro Manila. Sadtong Enero 9, nagtambong ang mga tiglawas sang mga progresibo nga organisasyon sa pampubliko nga pagtalakay angot sa taas-plete nga ginlunsar sang Department of Transportation. Ginpabutyag nila diri ang mabaskog nga pagpamatok.

Welga sa Handyman. Nagpasaka sang welga sadtong Enero 6 ang mga mamumugon sang Handyman-True Value-Pet Lovers Empowered Workers Union sa nagapanguna nga depot sang handyman sa Manila Bay Spinning Mills Compound sa Marikina City. Natulod sila nga magbalhin kag tukuron ang piket sa hedkwarters sang Robinsons Retail Holdings, Inc, (RRHI) tag-iya sang Handyman sa Quezon City tungod sa iligal nga pagbungkag sa ila nga welga. Sabat ini sang unyon sa iligal nga kaksanay sa indi magnubo sa 122 ka mamumugon sadtong Nobyembre 2024. Ginkakas sila sang RRHI tungod sa pagtib-ong sang ila nga unyon.