Nagbubunyi ang Melito Glor Command-NPA Southern Tagalog sa ika-56 anibersaryo ng NPA na tangan ang mataas na militansya at optimistikong diwang magwawagi ang digmang bayan. Inspirasyon ng Pulang hukbo ang laksa-laksang mamamayang Pilipino na walang pag-aalinlangang sumusuporta sa kanila. Kung kaya sa gitna ng kilusang pagwawasto, panata ng NPA na suungin ang lahat ng mga kahirapan at sakripisyo upang labanan at wasakin ang pasista-teroristang estado.

Pinagpupugayan ng MGC-NPA ST ang mga dakilang martir at bayani ng sambayanan na nag-alay ng kanilang buhay para sa dakilang digma ng pagpapalaya para sa bayan. Ang kanilang mga rebolusyonaryong ambag ay hindi kailanman kalilimutan ng sambayanan. Inspirasyon ang maningning nilang buhay at pakikibaka. Makaaasang ipagpapatuloy ng kasalukuyang henerasyon ng mga rebolusyonaryo ang kanilang simulain.

Sa okasyong ito, tiyak na nagdiriwang ang mga yunit ng NPA sa gitna ng masinsing operasyong militar. Pinasusubalian nito ang mga deklarasyong “insurgency-free” na ang lugar at ang kasinungalingang kinakalat ng AFP na “mayroon na lamang isang pinahinang larangang gerilya ang NPA”. Hindi mauubos ang NPA hangga’t patuloy na inaapi at pinagsasamantalahan ang masang anakpawis—sila ang di nasasaid na balon ng Hukbong Bayan. Mulat ang mga magsasaka na hindi nila mapakikinabangan ang kanilang lupa kung hindi dahil sa tagumpay ng pakikibaka ng rebolusyonaryong kilusan para rito. Kaagapay nila ang NPA sa pagtatanggol sa lupa at mga karapatan at kasama sa pakikibaka para sa lupa at kabuhayan.

Dahil sa desperasyong lipulin ang rebolusyonaryong kilusan, walang awat ang AFP-PNP sa paglulunsad ng mga operasyong militar sa buong bansa sa anyo ng pinaigting na mga focused and sustained military operations at modified community support program. Gumagamit ito ng mga modernong sandatang helicopter, jetfighter, howitzer at drone mula sa ayudang militar ng imperyalismong US. Mamamayan ang pangunahing tinatamaan ng kontra-rebolusyonaryong gera na nagdurusa sa patung-patong na mga paglabag ng AFP-PNP sa karapatang tao kagaya ng pambobomba, pamamaslang, panghahamlet, tortyur, interogasyon, iligal na pang-aaresto, panggagahasa, blokeyo sa pagkain at iba pa.

Nilalayon ng pasistang pang-aatake ng estado sa mamamayan na ilayo at ihiwalay ang NPA sa sambayanang Pilipino. Subalit lalo lamang nag-aalab ang galit ng mamamayan sa paninibasib ng AFP-PNP sa gitna ng laganap na kagutuman at pagdausdos ng kabuhayan. Higit na nalalantad ang AFP-PNP bilang protektor ng mga dambuhalang korporasyon at mapandambong na rehimen ni Marcos. Sinusupil ng mga berdugo ang makatarungang pakikibaka ng mamamayan. Lalong nakikintal sa isip ng mamamayan na ang NPA ang kanilang tunay na hukbo na lumalaban para sa kanilang interes. Sa halip na matakot, lalong hinahangad ng mamamayan ang presensya ng NPA sa kanilang lugar.

Ang patuloy na pagsuporta ng masang magsasaka at iba pang uring api sa NPA ay nagbibigay-lakas sa mga Pulang kumander at mandirigma. Sa gitna ng kagipitan, nakahandang makipaggitgitan ang mga yunit ng NPA sa mga pwersa ng AFP upang muling makaugnayan ang masa at tupdin ang mga tungkulin sa demokratikong rebolusyong bayan.

Determinado ang NPA na iwasto ang mga pagkakamali at muling magpalakas upang palagablabin ang apoy ng digmang bayan. Humakbang na ang NPA upang igpawan ang mga pagkakamali at kahinaan ng konserbatismo at pasibidad na matalas na tinukoy ng Communist Party of the Philippines. Mapangahas itong tumutuklas ng mga bagong teknika at taktika sa pagsusulong ng digmang bayan—sa pagpapasigla ng armadong pakikibaka, pagpapalawak ng baseng masa at pagpapaputok ng mga pakikibaka sa rebolusyong agraryo. Katuwang ang malawak na masa sa pakikidigmang gerilya, gagamitin ang lahat ng sandata—mga baril at bomba hanggang sa mga bato, pasulo, itak at iba pang kagamitan ng masa—sa paglulunsad ng mga taktikal na opensiba. Parusahan ang mga pusakal na kaaway at samsamin ang mga armas upang palakasin ang Hukbong Bayan!

Nananawagan ang MGC-NPA ST na sumapi ang pinakamabubuting anak ng bayan sa NPA. Makipamuhay at mag-ambag sa NPA sang-ayon sa programa ng mga rebolusyonaryong samahang masa sa kanayunan at kalunsuran sa anyo ng pagpapapultaym, pagpapasanib, integree o tour of duty. Magtipon at magpadala ng anumang suporta—pinansyal, sandata, munisyon, lohistika at iba pa sa NPA.

Mula nang itatag, pinatunayan ng NPA ang katapatan nito sa tungkulin na kamtin ang tunay na kalayaan at demokrasya sa landas ng demokratikong rebolusyong bayan. Kasama ang malawak na masang Pilipino, tiyak na maipagwawagi ng NPA ang digmang bayan.