Mag-uuma, gipatay sa Negros Oriental

,
Kini nga artikulo adunay hubad sa PilipinoEnglishHiligaynon

Gipatay sa 62nd IB si Greg Cantela, mag-uuma ug lumulupyo sa Sityo Manlibod, Barangay Trinidad, Sa Guihulngan City, Negros Oriental, alas-6 sa buntag niadtong Setyembre 7. Pinakaulahi siya sa mga gipatay sa militarisadong isla.

Gitaho sa BHB-Negros ang binatalyong operasyon sa Armed Forces of the Philippines (AFP) sa kabukiran ug komunidad sa Negros Occidental. Sa mga barangay sa Calatrava ug Toboso sa Negros Occidental, usa ka batalyong tropa sa 79th IB ang naglunsad og nakapokus nga operasyon gikan Agosto 26.

Samtang, gibanabanang 200 ka tropa sa 94th IB ug SAF ang nakakampo sa kabukiran ug mga barangay sa Himamaylan City, Binalbagan ug Isabela gikan Agosto 11.

Pagdagit ug iligal nga detensyon. Upat ka adlaw nga gitago sa 4th ID sa AFP si Raquel Dahoyla Santillano, usa ka rebolusyonaryo nga naglihok sa North Central Mindanao, ayha siya gihikyad ug giprisintang “misurender.” Gidakop sa giusang pwersa sa 1st Special Forces Battalion, Military Intelligence Battalion ug 51st IB si Santillano niadtong Setyembre 4 sa Bumbaran, Lanao del Sur. Naggikan siya sa pagpatsek-ap sa iyang balatian sa dugukan.

Ang pagdagit ug iligal na pagpriso kang Santillano, diha-dihang gibutyag ug gibatikos sa social media. Kini ang nagpugos sa 4th ID nga maghimuhimu og estorya sa pagsurender aron hatagag pangatarungan ang mga paglapas nila sa mga katungod sa biktima. Gibuhian si Santillano niadtong Setyembre 16.

Pagpanghasi. Gitaho sa Bayan-Gitnang Luson ang pagpaniktik sa mga elemento sa estado sa ilang pangkinatibuk-ang kalihim nga si Au Santiago niadtong Setyembre 17. Matud kang Santiago, nagpaila ang mga pulis nga gikan sila sa DILG Region 3 ug mibisita sa balay sa iyang anak niadtong Setyembre 16. Ayha niini, nakadawat si Santiago og mga hulga gikan kanila pinaagi sa text.

Sa susamang adlaw, gipugos sa mga pulis gikan sa PNP-Quezon City nga mosurender isip Pulang manggugubat si Aries Soledad, myembro sa Pamalakaya-Cavite.

Sa Bohol, tulo ka aktibista ang gipasakahan og gama-gamang kaso. Sa taho sa HUMABOL-KMP, gikasuhan og homicide silang Joemar Pogio, kanhing koordineytor sa organisasyon; Racquel Autida, kanhing koordineytor sa Gabriela-Bohol; ug ang executive director sa Women’s Development Center nga si Maria Ira Pamat. Gilambigit ang tulo sa nahitabong engkwentro tali sa mga elemento sa 47th IB ug hukbong bayan sa Barangay Bayawahan, Sevilla, Bohol niadtong Hunyo 26, 2020.

Mag-uuma, gipatay sa Negros Oriental