Upat ka armadong aksyon ang gilunsad sa mga yunit sa Bagong Hukbong Bayan (BHB) sa Negros, Sorsogon ug Agusan del Sur gikan Setyembre 5 hangtud 14.

Napatay sa operasyong partisano sa BHB-Sorsogon niadtong Setyembre 5 si Police Executive M/Sgt. Israel Rebosura ng Pilar Municipal Police Station sa Purok 2, Sityo Cagduyong, Barangay Ginablan, Pilar, Sorsogon. Aktibo siya sa pagpaniktik ug pagbutang og kutay sa mga impormer sa pulis sa mga baryo sa Pilar.

Sa Negros Occidental, gipabuthan sa BHB ang kapin 30 ka sundalo sa 94th IB nga nagpatrulya sa Sityo Dawahan, Barangay Buenavista, Himamaylan City niadtong Setyembre 6. Mipaturatoy sa dagan ang mga sundalo dala ang pipila ka mga kaswalti.

Usa ka pulis ang napatay sa pag-isnayp sa BHB sa usa ka substation sa pulis sa Sityo Parkingan, Barangay Trinidad, Guihulngan City, Negros Oriental niadtong Setyembre 10. Sa misunod nga adlaw, napatay ang usa ka sundalo sa 62nd IB sa pag-isnayp sa mga Pulang manggugubat sa tropa niini sa Sityo Tuko Gamay. Nagkampo duul sa sibilyang komunidad ang maong mga sundalo, butang nga lapas sa internasyunal nga makitawhanong balaod.

Samtang sa Agusan del Sur, usa ang napatay ug tulo ang nasamdan sa ambus sa BHB batok sa giusang tropa sa 26th IB, 41st DRC ug Special Forces sa bukirong bahin sa Barangay Moretola, San Luis niadtong Setyembre 14.