Ginpatay sang 62nd IB si Greg Cantela, mangunguma kag residente sang Sityo Manlibod, Barangay Trinidad, Guihulngan City, Negros Oriental, alas-5 sang aga sang Septyembre 7. Pinakaulihi ini sa mga ginpatay sa militarisado nga isla.

Ginreport sang BHB-Negros ang binatalyon nga operasyon sang Armed Forces of the Philippines (AFP) sa kabukiran kag komunidad sang Negros Occidental. Sa mga barangay sang Calatrava kag Toboso sa Negros Occidental, isa ka batalyon sang 79th IB ang nagalunsar sang nakapokus nga operasyon umpisa Agosto 26.

Samtang, ginatantya nga 200 tropa sang 94th IB kag SAF ang nakakampo sa kabukiran kag mga barangay sang Himamaylan City, Binalbagan kag Isabela halin Agosto 11.

Pagdukot kag iligal nga detensyon. Apat ka adlaw nga gintago sang 4th ID sang AFP si Raquel Dahoyla Santillano, isa ka rebolusyonaryo nga nagahulag sa North Central Mindanao, antes siya gintuhaw kag iprisintar nga “nagsurender”. Gindakup sang gintingub nga pwersa sang 1st Special Forces Battalion, Military Intelligence Battalion kag 51st IB si Santillano sang Septyembre 4 sa Bumbaran, Lanao del Sur. Naghalin siya sa pagpatsek-ap sa ginabatyag nga sakit sa taludtod.

Ang pagdukot kag iligal nga paghunong kay Santillano ginbuyagyag kag ginpakamalaut sa social media. Ini ang nagtulod sa 4th ID nga magbalay sang istorya nga pagsurender para hatagan rason ang mga paglapas nila sa mga kinamatarung sang biktima. Nahilway siya sang Septyembre 16.

Pagpangdahas. Ginreport sang Bayan-Gitnang Luson ang pagpaniktik sang mga elemento sang estado sa ila pangkabilugan nga sekretaryo nga si Au Santiago sang Septyembre 17. Suno kay Santiago, nagpakilala ang mga pulis nga halin sa DILG Region 3 kag nagbisita sa balay sang iya anak sang Septyembre 16. Antes sini, nakabaton si Santiago sang mga pamahug sa iya paagi sa text.

Sang adlaw man nga ini, ginpilit sang mga pulis halin sa PNP-Quezon City nga magsurender bilang Pulang hangaway si Aries Soledad, katapu sang Pamalakaya-Cavite.

Sa Bohol, tatlo ka aktibista ang ginpasakaan sang himu-himo nga kaso. Sa report sang HUMABOL-KMP, ginkasuhan sang homicide sanday Joemar Pogio, anay koordineytor sang organisasyon; Raquel Autida, anay koordineytor sang Gabriela-Bohol; kag ang executive director sang Women’s Development Center nga si Maria Ira Pamat. Ginadalahig ang tatlo sa natabo nga engkwentro sa tunga sang mga elemento sang 47th IB kag hangaway sang banwa sa Barangay Bayawahan, Sevilla, Bohol sang Hunyo 26, 2020.