Ginsilutan sa Bagong Hukbong Bayan (BHB)-Central Negros niadtong Setyembre 24 ang usa ka elemento sa CAFGU nga anaa sa likod sa mga pagpatay sa mga sibilyan sa Guihulngan City. Gitarget sa usa ka partisanong operasyon si Joselito Raboy, operatiba sa daghang operasyong kombat sa 62nd IB ug mga yunit sa pulis.

Lakip sa pinakadakung krimen ni Raboy ang iyang papel sa pagmasaker sa pamilyang Jacolbe sa Guihulngan City niadtong Hulyo 26. Dinhi gipatay ang 5-ka-bulang mabdos nga si Cristina Jacolbe, ang iyang 16-anyos nga anak nga si Everly Kee ug kauban nila kaniadto nga si Rodan Montero. Lakip usab si Raboy sa mga tropang militar nga nagpaulan og bala ug sulayng pagpatay nilang Boyer Cesar ug Marjun Mahinay niadtong Hulyo ug Agosto. Armadong nagbalay-balay si Raboy, kauban ang duha pa ka myembro sa CAFGU, aron hadlukon ug hulgaon ang mga residente sa usa ka barangay.

“Ang nahitabong pagsilot… magsilbing pahimangno sa tanang makinarya sa militar batok sa kalihukan ilabina ang nagsurender nga nagpagamit sa pasistang AFP, PNP ug NTF-Elcac bugti sa gisaad nga kwarta kung asa nagresulta sa pagkaguba sa panginabuhian, kinabuhi ug may utang nga dugo sa katawhan sa Central Negros,” matud kang JB Regalado, tigpamaba sa BHB-Central Negros. Pursigido ang BHB sa isla sa pagpangita og paagi sa pagsilot aron ihatag ang angayang hustisya alang sa mga biktima sa pasismo sa estado, matud niya.