Nagprotesta ang mga mamumuo ilalum sa Liwayway Workers Union (LIWU-ANGLO-KMU) atubangan sa upisina sa DOLE Central Visayas niadtong Setyembre 19 ug 22 batok sa malukpanong pagpanangtang sa kumpanya. Giatol nila ang protesta samtang ginadungog ang kaso sa kontraktwalisasyon sa pabrika. Pipila ka bulan nang sarado ang pabrika bunga sa planong pagbalhin niini sa operasyon sa Liloan gikan sa Mandaue City, pareho sa isla sa Cebu.

Samtang, gikundena sa Alyansa sa mga Mamumuo sa Sugbo-Kilusang Mayo Uno ang pagtangtang sa 4,485 ka mamumuo sa lima ka pabrika sa sanina nga gipanag-iyahan sa usa ka kumpanyang Taiwanese sa Mactan Export Processing Zone. Gianunsyo ang pagtangtang sa lima ka kumpanya niadtong Setyembre 29. Matud sa grupo, ang tinuod nga laraw sa pagpanangtang mao ang ipabiling ubos ang suhulan ug molikay sa pagpatuman sa gimando nga umento. Gipunting sa mga mamumuo nga layong ubos kaayo ang ilang suhulan nga ₱435/adlaw kumpara sa susamang mamumuo sa Taiwan nga adunay suhulan nga ₱1,631/adlaw.

Dugang dinhi, nakadawat og taho ang grupo nga dihadiha dayong gipulihan sa mga kumpanya og mga bag-o ang gisisanteng mga mamumuo. “Dakung inhustisya kini sa gitangtang nga mga mamumuo nga mawad-an sila og trabaho tungod sa grabeng krisis sa kalibutan, para lang pulihan sila.”

Girason sa mga kumpanya ang umabutay nga pangkalibutang resesyon nga adunay kaubang taas nga implasyon ug lisud nga kundisyong pangpinansya isip hinungdan sa pagsira. Sama sa uban pang subsektor sa pagmanupaktura, nagsalig sa langyawng materyal ug makinarya ang pagmanupaktura sa sanina. Nakapunting ang mga produkto niini sa pangkalibutang merkado.

Kadungan sa pagsisante sa Mactan ang pagpanangtang usab sa wala pa masutang ihap sa mga mamumuo sa Shopee Philippines.