Haw-ang para sa mga mag-uuma ug mangingisda ang saad sa rehimeng Marcos nga siguruhon niyang “makab-ot” ug “masustansyang pagkaon” alang sa matag Pilipino. Gawas sa wala siyay gihimo, gipagrabe pa sa iyang mga neoliberal nga palisiya ang kagutom nga nasinati sa mga nagamugna og pagkaon.

Lakip ang mga mag-uuma ug mangingisdang Pilipino sa kapin 828 milyong katawhan sa tibuok kalibutan nga nakasinati sa kagutom niadtong 2021, matud sa United Nations Food and Agriculture Organization (FAO). Luyo sa tinuig nga saad nga suporta sa sektor agrikultura ug mga programang nutrisyon sa mga milabayng gubyerno, nagpabilin ang Pilipinas sa listahan sa FAO sa 63 ka nasud nga adunay pinakadakung ihap sa katawhan nga “undernourished” o kulang sa nutrisyon.

Walay suporta ang estado aron agapan ang nagkamahal nga gasto sa produksyon sa agrikultura. Matud sa grupong Amihan, ang kinatibuk-ang gasto sa pagtanum og humay niadtong ulahing siklo mikabat og ₱53,000 sa Nueva Ecija. Nag-una dinhi ang mahal kaayong abono nga nagkantidad og ₱16,400 para sa Urea ug Triple 14. Matud nila, ginapagrabe sa mga kalamidad nga dala sa climate change sama sa mga bagyo ang kahimtang sa mga mag-uuma.

Dugang paantus ang nahiaguman sa mga mag-uuma nga pagpanghasi ug pagpanghadlok sa matag pagdepensa nila sa ilang katungod sa yuta. Sa halos tanang suuk sa nasud, biktima ang mga mag-uuma sa red-tagging, iligal nga pag-aresto ug detensyon, ekstrahudisyal nga pagpamatay ug klase-klaseng paglapas sa tawhanong katungod. Daghan sa mga kaso sa paglapas sa ilang mga katungod ang wala naabot sa midya ug mga sentro.