TULO KA AMBUS ang gilunsad sa mga yunit sa Bagong Hukbong Bayan (BHB) sa tulo ka prubinsya sa nasud sa milabayng mga semana. Gihampak sa BHB ang pinakabrutal ug pinakalunod-patay nga mga yunit sa Armed Forces of the Philippines (AFP) sa tagsa-tagsa nilang langkub nga erya.

Sa Surigao del Sur, tulo ang napatay ug usa ang nasamdan sa nag-operasyong tropa sa Charlie Company sa 75th IB dihang giambus sila sa mga Pulang manggugubat sa Barangay Mahaba, Marihatag niadtong Oktubre 6. Nakasakay ang mga sundalo sa tulo ka motor dihang giambus sila bandang ala-7:35 sa buntag. Gipaulanan sila og bala sa mga manggugubat nga may pito ka metrong gilay-on.

Sa Masbate, giambus sa usa ka yunit sa BHB ang mga CAFGU nga nagabyahe sa utlanan sa Barangay Mambog ug Buenaflor sa Dimasalang niadtong Oktubre 7. Usa ang napatay ug usa ang nasamdan sa mga sundalo. Nakasakay sila og motor ug pauli na unta human ang 15 ka adlaw nga pagbantay sa detatsment sa 2nd IB sa Barangay Miabas, Palanas.

Sa Albay, giambus sa BHB-Albay ang 16-katawong yunit sa 49th IB sa Barangay Bagacay, Jovellar niadtong Oktubre 3. Pito ka sundalo ang napatay sa maong ambus. Upat ang kumpirmadong dihadihang napatay sa armadong aksyon. Sa misunod nga adlaw, usa pa ka patay ang nakaplagan sa nahitaboan sa insidente samtang duha ang grabeng nasamdan nga napatay kadugayan.