Gindakup kag ginkulong sang pulis sa himu-himo nga kaso si Benjamin Cordero, puno sang Labor Sector sang Quezon City Development Council, myembro sang Samahan ng Manggagawa sa Quezon City kag upisyal sa kampanya sang Urban Poor Coordinator Council sang National Capital Region, sang Oktubre 25 sang alas-11:40 sang gab-i sa iya puluy-an sa Quezon City. Ginpasakaan siya sang kaso nga napaslawan nga pagpatay sa Batasan Police Station 6. Temporaryo nga nahilway si Cordero sang Oktubre 27 pagkatapos magpyansa.

Luwas kay Cordero, ginhingadlan man sa mandamyento nga ginpresentar sa iya sanday Dabilo Basilio kag Amor Reyes Acayen, nga pareho nga halin sa tribong Dumagat. Napatay sa balatian si Acayen sadtong Agosto pa. Kilala siya nga lider sang mga Dumagat o elder halin sa Sityo Kanlusong, Barangay Puray, Rodriquez, Rizal.

Pagpanganyon. Tatlo ka beses nga nagpalupok sang kanyon ang 203rd IBde sa Mansalay, Oriental Mindoro sang Oktubre 18. Ginpalupok ini malapit sa mga barangay sang Waygan kag Sta. Teresita nga nagdulot sang kakulba kag pagkatublag sa mga residente. Luwas diri, nagkwartel pa ang mga suldado sa barangay hall sang Waygan kag naghambal nga magakampo sila diri sang masobra anum ka bulan.

Pagpang-ipit. Pwersahan nga ginsulod kag ginransak sang mga suldado sang Philippine Army ang balay sang mangunguma nga si Kiling Turing sa Sityo Pandayan, Barangay Tan-awan, Placer, Masbate sang Oktubre 19. Ginkawat sang mga suldado ang anum ka sako nga palay nga gin-ani ni Turing kag gindala sa ila kampo. Ginpaggwa sang militar nga suplay kuno sang hangaway sang banwa ang mga palay gani ginkumpiska ini. Ginkawatan man sang palay ang siyam pa ka mangunguma sa amo nga lugar.