Nagasulunod nga protesta ang ginlunsar sang mga grupo sang mangunguma para dumdumom ang Bulan sang Mangunguma sang Oktubre. Nakig-isa sila sa ika-14 nga International Day of Rural Women (Pangkalibutanon nga Adlaw sang Kababainhan sa Kaumhan) sang Oktubre 5 kag ika-43 nga World Food Day (Adlaw sang Pagkaon) sang Oktubre 17 nga ginatawag man nga “World Hunger Day” (Pangkalibutanon nga adlaw sang Kagutuman). Sa pareho nga okasyon, nagkadto sila sa Department of Agriculture (DA) sa Quezon City kag ginduso ang ila demanda para sa duta, trabaho kag subsidyo.

Sa Adlaw sang mga Mangunguma sang Oktubre 21, nagmartsa sila pakadto sa taytay sang Mendiola sa Maynila. Nagsanto ang martsa sa pagdumdom sa ika-50 tuig sang Presidential Decree (PD) 27, ang paltik kag kontra-mangunguma nga layi sa reporma sa duta sang diktaduryang Marcos. Ang mandu nga ini ang nagsalbar sa ginpaboran nga mga agalon nga mayduta sang diktadurya, kag naglubong sa krisis kag kabudlay nga tubtob subong ginabatyag sang mga mangunguma. Nag-entra diri ang mga mangunguma halin sa Southern Tagalog, Central Luzon, Ilocos kag Cagayan Valley.

Isa ka adlaw antes sini, naglunsar sang sunod-sunod nga protesta sa pungsodnon nga upisina sang ahensya sang depensa, reporma nga agraryo, environment and natural resources kag agrikultura ang masobra isa ka gatos nga mangunguma halin sa KASAMA-Timog Katagalugan. Nakipagdayalogo sila sa mga upisyal sang DA. Dala nila ang panawagan nga Duta, Ayuda, Hustisya! Ginhatagan-pagtamod sang ila mga lider ang kaso sang isa ka mangunguma kag isa ka bata nga ginpatay sang berdugo nga militar sa Batangas sa tabon sang mga peke nga engkwentro.

Sa Visayas, ginsaulog sang Hugpong sa mga Mag-uumang Bol-anon (HUMABOL-KMP) ang ika-38 anibersaryo sang pagtukod sini, kadungan sang paghiwat sang ika-15 Kongreso sang organisasyon sadto man nga Oktubre 21.

Sang Oktubre 23, gin-umpisahan ang bungkalan sa duta nga Tartaria sa Barangay Tartaria, Silang, Cavite sa pagpanguna sang Samahang Magsasaka ng Tartaria. Panawagan nila nga untaton ang pagpang-agaw sa ila nga duta sang pamilya Aguinaldo.

Ginsaulog sang mga mangunguma halin sa Katipunan sang mga Lehitimong Magsasaka kag Mamamayan sa Lupang Ramos (Kasama-LR) ang ika-4 anibersaryo sang Pagsambang Bayan sa Lupang Ramos sang Oktubre 24.