Gidakop ug gipriso sa pulis sa gama-gamang kaso si Benjamin Cordero, lider sa Labor Sector sa Quezon City Development Council, myembro sa Samahan ng Manggagawa sa Quezon City at upisyal sa kampanya sa Urban Poor Coordinator Council sa National Capital Region, niadtong Oktubre 25 sa alas-11:40 sa gabii sa iyang balay sa Quezon City. Gipasakahan siya og gama-gamang kasong pakyas nga pagpatay sa Batasan Police Station 6. Temporaryong nakagawas si Cordero niadtong Oktubre 27 human makapyansa.

Gawas kang Cordero, ginganlan usab sa giisyung mandamyento kaniya silang Dabilo Basilio ug Amor Reyes Acayen, nga parehong gikan sa tribung Dumagat. Namatay sa sakit si Amor Acayen kaniadto pang Agosto. Naila siyang lider sa mga Dumagat o elder gikan sa Sityo Kanlusong, Barangay Puray, Rodriguez, Rizal.

Pagpanganyon. Tulo ka hugna nga nagpabuto og kanyon ang 203rd IBde sa Mansalay, Oriental Mindoro niadtong Oktubre 18. Gipabuto kini duul sa mga barangay sa Waygan ug Sta. Teresita nga nagbunga og kahadlok ug kalisang sa mga residente. Gawas niini, nagpundo pa ang mga sundalo sa barangay hall sa Waygan ug nagsulting magkampo didto og kapin unum ka bulan.

Pagpamig-ot. Pugos nga gisulod ug giransak sa mga sundalo sa Philippine Army ang balay sa mag-uumang si Kiling Turing sa Sityo Pandayan, Barangay Tan-awan, Placer, Masbate niadtong Oktubre 19. Gikawat sa mga sundalo ang unum ka sako sa humay nga giani ni Turing ug gidala sa ilang kampo. Gipagawas sa militar nga suplay kuno sa hukbong bayan ang mga humay mao nang gikumpiska. Gikawatan usab og humay ang siyam pa ka mag-uuma sa maong lugar.