Wala malimud sa militar ug pulis ang krimen ni Brig.Gen. Jesus Durante III, kumander sa 1001st IBde, human nabutyag sa publiko ang ebidensya nga iyang gipapatay si Yvonne Chua-Plaza, usa ka babayeng negosyante. Mismong ang lima ka elemento sa 1001st IBde nga nalambigit sa pagpamatay ang nagtudlo kaniya isip utak sa krimen. Gipusil si Chua-Plaza atubangan sa gipuy-an niyang balay niadtong Disyembre 30, 2022.

Gawas kang Durante, ginganlan nga lambigit sa krimen ang bise kumander niyang si Colonel Michael Licyayo ug lima pang sundalo. Ayha niini, gibutyag sa mga paryente ug higala ni Chua-Plaza ang mga panagbayloay og mensahe sa telepono tali niya ug ni Durante, ingonman ang mga litrato sa negosyante nga bun-og ang tawong ug mga braso. Sa iyang mga mensahe, direkta niyang ginganlan nga si Durante ang nangulata kaniya.

Lakip sa mga post ni Chua-Plaza ang hulga nga iyang ibutyag ang tinuod nga panghitabo sa pagpatay sa militar kang Menardo Villanueva (Ka Bok) ug Chad Booc. Matud niya, daghan siyang ebidensya sa gihimo mismo ni Durante kang Villanueva ug Booc. Gilakipan niya og litrato sa patayng lawas ni Ka Bok ang iyang post ug daghan pa daw siyag litrato.

Gituboy si Durante isip kumander sa 1001st IBde niadtong Agosto 2021, human siyang magsilbing hepe sa Presidential Security Group sa kanhing presidente nga si Rodrigo Duterte. Ayha niini, nagsilbi siya sa 1st Scout Ranger Battalion, ug hepe usab sa Task Force Davao.


Berdugong bakakon

Niadtong Pebrero 24, 2022, gipanghinambog ni Durante ang pagpatay sa 1001st IBde sa mga magtutudlong sina Chad Booc ug Gelejurain Ngujo, kauban ang sama nilang sibilyan nga silang Elgyn Balonga, Tirso Añar ug Robert Aragon sa New Bataan, Davao de Oro. Gipanghingusog ni Durante nga napatay ang lima sa usa ka engkwentro, bisan og gipanghimakak na sa lokal nga yunit sa hukbong bayan nga adunay nahitabong panagsangka sa lugar. Migawas sa awtopsiya sa patayng lawas ni Booc nga tinuyo siyang gipatay.

Si Durante usab ang nag-anunsyo sa mga bakak nga napatay sa mga engkwentro ang tulo ka mga kadre sa Partido sa Southern Mindanao Region niadtong 2022.

Usa dinhi si Villanueva nga matud niya napatay sa Barangay Libudon sa Mabini, Davao de Oro niadtong Enero 5, 2022. Ang tinuod, Disyembre 2021 pa gunit sa 1001st IBde si Villanueva. Gitago ug gitortyur siya ayha gilutaw nga patay na. Gipatay usab sa mga berdugo si Sandra Reyes (Ka Kaye) nga gituuhang nadakpan kauban ni Ka Bok.

Usa pa ka ngilngig nga kaso ni Durante ug sa 1001st IBde ang pagdagit, pagtago ug kadugayan tinuyong pagpatay kang Ezequiel Daguman (Ka Rey) niadtong Marso 2022.