Dili makatarunganong giaresto sa mga sundalo ug pwersa sa Criminal Investigation and Detection Group (CIDG) ang konsultant sa National Democratic Front of the Philippines (NDFP) alang sa panaghisgot kalinaw nga si Ruben Saluta, 75, ug iyang asawa ug parehong rebolusyonaryong si Presentacion Cordon Saluta, 63, uban si Yvonne Losaria sa ilang gisak-ang balay sa Doña Soledad, Barangay Labangal, General Santos City niadtong Enero 30.

Giaresto si Saluta subay sa gama-gamang mga kaso sa pagpatay samtang si Presentacion ug Losaria gipasakaan og mga kasong rebelyon. Dugang dinhi, ginapagawas sa mga pwersa sa estado nga nakuha kanila ang unum ka tag-as nga kalibreng armas, mga bala ug uban pang gamit militar. Si Saluta, tiguwang na ug adunay chronic pulmonary disease. Parehong adunay hypertension siya ug ang iyang asawa.

Sa Baguio City, giaresto sa mga pulis si Jennifer Awingan, usa ka minorya sa Kalinga ug myembro sa Cordillera Peoples Alliance (CPA) sa iyang balay sa Barangay Pinsao Proper niadtong Enero 30. Gipasakahan siya, lakip ang walo pa, og gama-gamang kasong rebelyon sa rehiyon sa Cordillera ug Ilocos.

Lakip sa mga gikasuhan mao silang Windel Bolinget ug Steve Tauli, parehong mga upisyal sa CPA, Sarah Abellon, Lourdes Gimenez, Florence Kang, midya sa Northern Dispatch nga si Niño Oconer, ug silang Jovensio Tangbawan ug Salcedo Dumayom Dappay Jr. Dili sila pwedeng magpyansa sa maong mga kaso.

Giaresto usab sa mga pulis ang unyonista ug propesor sa UP Diliman nga si Prof. Melania Flores niadtong Pebrero 6. Gipasakahan siya og kasong “paglapas sa Social Security Law.” Matud sa mga grupo, pagpamig-ot kini sa mga aktibista ug progresibong personahe.

Samtang niadtong Enero 30, gihikyad sa publiko sa Anti-Terrorism Council (ATC) ang pagdeklarang “terorista” kang Dr. Natividad Castro, iladong duktor nga gipiling magsilbi sa mga komunidad sa Lumad ug mag-uuma sa Mindanao. Ang ATC usa ka kapunungan nga gimugna sa epektibidad sa Anti-Terror Law.

Sulayng pagmasaker. Napatay si Danny Malinao sa sulay nga pagmasaker sa 3rd Special Forces Battalion sa lima ka mag-uuma sa Sityo Emerald, Diatagon, Lianga, Surigao del Sur niadtong Enero 24. Nag-ani ang lima og gulay dihang gipaulanan sila og bala sa mga sundalo. Gipagawas kini sa 3rd SFB nga usa ka engkwentro sa hukbong bayan.

Paglapas sa makitawhanong balaod. Nadakpan sa mga sundalo sa 85th IB ang samarong Pulang manggugubat si Jose dela Cruz o Ka RC human ang usa ka panagsangka sa Barangay Huyon-uyon, San Francisco, Quezon niadtong Enero 29. Giparada siya nga daw usa ka tropeyo imbes nga ilhon isip bihag sa gubat ug tambalan ang iyang mga samad.

Atake sa mga komunidad. Giatake sa halos 200 ka sundalo sa 62nd IB ang Barangay Amuntay, Binalbagan, Negros Occidental ug mga barangay sa Talaon, Aya ug Cansumandig sa La Libertad, Negros Oriental gikan Enero 21 hangtud 27. Narekord dinhi ang lain-laing kaso sa paglapas sa tawhanong katungod.

Sa lungsod sa La Libertad, tulo ka hugna nga pugos nga gisulod ug giutingkay sa mga sundalo ang balay sa tigulang nga magtiayong Marting ug Roama Pedro sa Barangay Amuntay niadtong Enero 22 ug 23. Sa Barangay Aya, giransak ug giguba sa militar ang balay ni Dongkoy Pahayahay niadtong Enero 26. Gisulod usab ang balay sa magtiayong Pecore sa Sityo Mabato, Barangay Talaon.

Niadtong Pebrero 2, gibaharang punggutan og ulo sa 79th IB ang mga mag-uuma nga silang Rex Lumayno ug Eric Opinggo sa Sityo Odiong, Barangay Bandila, Toboso, Negros Occidental samtang iligal nga nakadetine.

Samtang, giransak sa mga sundalo ang balay ni Toto Palay sa parehong barangay bag-o lang ug gihulgang bombahan kini.

Niadtong Enero 7, gihulga sa militar ang sibilyang si Wendel Pasinabo nga punggutan og ulo.