Gikundena sa National Democratic Front-Ilocos ang planong paglunsad sa ika-38 Balikatan Exercises sa mga sundalong Pilipino ug Amerikano sa Ilocos Norte sa umalabot nga Abril 24-27. Nakatakda kining salmutan sa 16,000 ka sundalo, matud sa pasiunang mga balita.

Matud sa NDF-Ilocos, ikaduhang ehersisyong militar na kini nga pagalunsaron sa Ilocos Norte. Unang gilunsad ang giusang pagbansay sa Philippine Marines ug US Marines sa Currimao ug Laoag City niadtong Hunyo 2022.

Sa pamahayag ni Col. Michael Logico, nga nangulo sa maong ehersisyong militar, gitudlo niini ang Barangay Bayog, Burgos isip “operational area” sa pagahimuong ehersisyo. Ang baybayon sa Bayog pagagamiton isip coastal air defense site. Dinhi usab ipahigayon ang live fire exercises aron sulayan ang mga bag-ong himang iggugubat sa US.

Barog sa NDF-Ilocos, ibutang niini sa peligro ang katawhang Ilocano ug pagayatakan ang soberanya sa Pilipinas. Nagpahimangno usab sila sa peligro nga ibunga sa ehersisyo sa kinaiyahan lakip ang posibleng pagguba sa mga coral reef sa kadagatan sa lugar. Matud niini, isapeligro ilabina sa live fire exercises ang mga komunidad sa mga mangingisda ug mag-uuma.

Ang US-RP Balikatan Exercises nakagambalay sa dili patas nga Mutual Defense Treaty ug Visiting Forces Agreement. Dugang sa Ilocos Norte, adunay mga bahin kining pagalunsaron sa Fuga, Calayan ug Batanes.