Tulo ka maysakit nga Pulang manggugubat sa Bagong Hukbong Bayan (BHB)- Northeastern Mindanao Region ang gidagit ug tinuyo nga gipatay sa mga sundalo sa Armed Forces of the Philippines (AFP). Niadtong Marso 26, gidagit ang magtiayon nga silang Dano ug Rosalia Caindoy sa usa ka ospital sa Misamis Oriental samtang nagpatambal. Gipagawas nga napatay sila sa usa ka engkwentro tali sa AFP ug BHB sa Barangay San Juan, Bayugan City, Agusan del Sur sa sunod nga adlaw.

Niadtong Marso 29, gidagit usab sa AFP si Emanuel Llanos Anob, 67 anyos ug masakiton, sa haywey sa Butuan City. Gikan usab siya sa usa ka ospital. Nabalita pa sa iyang mga parente ang iyang pagkawala. Ginapagawas nga napatay si Anob sa usa ka engkwentro sa San Miguel, Surigao del Sur sa sunod nga adlaw. Basta na lang nga gibilin ang iyang patayng lawas sa usa ka funeral home sa Bayugan City.

Nataho usab ang kaso sa paglapas sa internasyunal nga tawhanong balaod sa pagpanamas-tamas sa mga sundalo sa 50th IB sa patayng lawas ni Onal Osia Balaoing (Ka Puk-et), usa ka Pulang manggugubat, nga napatay sa usa ka engkwentro sa Balbalan niadtong Marso 9. Pabalik-balik nila nga gipusil ang iyang patayng lawas hangtud nga nilugwa ang mga tina-e. Daghang bahin sa iyang kamot ug tiil ang nabali.

Sa Sorsogon, giparada sa 9th ID isip mga “surrenderee” silang Nestor Estillon ug Edwin Jimenez niadtong Abril 3. Si Estillon iligal nga giaresto sa 22nd IB sa Barangay Fabrica, Barcelona samtang si Jimenez, naila isip Ka Bro ug myembro sa hukbong bayan, gidakop sa 31st IB sa Barangay Lapinig, Gubat niadtong Marso 9 samtang nibisita sa iyang pamilya.