Samtang nagkaduul ang Mayo Uno, nagkadaghang mga sektor ang nagalunsad og mga protesta aron ipanawagan ang dugang-suhulan ug seguridad sa trabaho, kadungan sa pagpaubos sa presyo sa mga palaliton. Pipila sa mga protesta ang mosunod.

Gilunsad sa Kadamay ang tinuig nga Kalbaryo ng Maralita, ang usa ka semana nga pagprotesta sa mga kabus sa kasyudaran nga giatol sa Semana Santa sa tinuuhang Kristyano. Usa ka Misang Bayan ang gilunsad niadtong Abril 2 sa Bustillos Church sa Sampaloc, Maynila. Dala sa mga kabus ang mga lukay kung asa nakasulat ang mga panawagan alang sa dugang-suhulan, seguridad sa trabaho ug disenteng pabalay. Niadtong Lunes Santo, subli silang nagtapok sa Liwasang Bonifacio sa Maynila alang sa suhulan ug panginabuhian. Mahuman ang mga aktibidad sa kalbaryo sa Pasyon ng Masa sa Abril 4.

Petisyon para sa dugang-suhulan sa Calabarzon. Nagpasaka og petisyon niadtong Marso 27 ang 12 ka grupo sa pamuo ilalum sa Workers Initiative for Wage Increase (WIN4WIN) sa wage board sa Calabarzon (Region IV-A) para sa dugang-suhulan aron makab-ot ang unipormadong ₱750 minimum nga inadlawang suhulan. Sa kasamtangan, adunay upat ka managlaing minimun nga suhulan sa rehiyon.

Payday Protest. Midagsang sa nasudnong upisina sa DOLE ang mga mamumuo gikan sa Unity of Wage Increase Now sa adlaw sa tingsuhol (katapusan sa bulan) niadtong Marso 31 aron makmakon ang ahensya kalabot sa panawagan ug petisyon nga patas-an ang suhulan.

Empleyadong kontraktwal, himuong regular. Nagprotesta niadong Marso 24 ang mga empleyado sa gubyerno aron ipanawagan ang pagbasura sa Joint Circular No. 2 S. 2020 sa DBM ug COA nga nagtugot sa mga ahensya sa gubyerno nga mokuha og mga mamumuo sa mga labor agency.

Sa kasamtangan, adunay 700,000 ka kontraktwal, kaswal ug nagpailalum sa sistemang job order nga mga empleyado sa gubyerno. Gipanawagan usab nila ang pagpataas sa sweldo sa tanang mga empleyado padulong ₱33,000 kada bulan. Gipahigayon ang protesta atubangan sa upisina sa DBM.