Gidagit sa 59th IB niadtong Marso 27 ang tulo ka sibilyan sa Batangas ug gitago og kapin usa ka semana. Gidakop atubangan sa Medical Center-Western Batangas sa Balayan silang Lloyd Descallar, Alfred Manalo ug Angelito Balitostos. Si Balitostos, 65 anyos, naatlan nga niagi samtang ginadakop ang naunang duha.

Silang Manalo ug Descallar mga boluntir sa Sugarfolks Unity for Genuine Agricultural Reform (SUGAR)-Batangas. Human ang pipila ka adlaw sa pagpangita ug pagpahingusog sa grupo sa tawhanong katungod, napugos ang 2nd ID nga angkunon nga naa sa kustodiya nila ang tulo.

Pugos nga pagpasurender sa La Union. Pinugos nga “gipasurender” sa mga pulis ang upat ka mangingisda sa Timek ken Namnaman dagiti Babassit a Mangngalap iti La Union (TIMEK La Union – Pamalakaya) niadtong ikaduhang semana sa Marso. Kining upat mga residente sa Barangay San Manuel Norte, Agoo, La Union. Giimbitar sila sa prisuhan aron modawat kunuhay og ayuda pero pag-abot nila didto gipresenta sila isip mga “nisurender nga rebelde.”

Pagpamig-ot sa mga sibilyan sa Negros Occidental. Gisulod ang balay ug giinteroga sa mga pwersa sa 62nd IB silang Danilo ug Libeth Gerunda sa Sityo Caliban, Barangay Banog-banog, Isabela niadtong Marso 26 ug Marso 28. Gikuhaan sa mga sundalo og litrato ang mga anak sa magtiayon nga nag-edad og 16, 12 ug 5 ka tuig.

Militarisasyon sa Tondo ug Batangas. Nang-utingkay sa komunidad sa Hapilan ug Aroma sa Barangay 105, Vitas, Tondo ang kapin kun kulang 90 ka sundalo sa 11th IB niadtong Marso 9. Nisuroy sila aron sayron ang mga balay sa mga myembro sa Gabriela ug Kadamay. Ang Hapilan ug Armona mga komunidad nga nag-atubang sa mga hulga sa demolisyon aron hatagan og dalan ang proyektong Skyway Extension ug land reclamation.

Nagbalay-balay usab ang mga elemento sa 59th IB sa Barangay San Isidro Sur, Sto. Tomas, Batangas niadtong Marso 12. Maapektuhan ang komunidad sa itukod nga proyektong Sto. Tomas-Malvar Diversion Road.