Sunod-sunod nga taktikal nga opensiba sa BHB sa Masbate

,
Kini nga artikulo adunay hubad sa PilipinoEnglish

Naglunsad og sunod-sunod nga mga aksyong gerilya ang mga yunit sa Bagong Hukbong Bayan (BHB)-Masbate sa katapusang bahin sa Marso. Kabahin kini sa paningkamot sa hukbong bayan nga panalipdan ang masang Masbatenyo ug lumpagon ang nagatunhay nga pagharing militar sa prubinsya.

Dili moubos sa 20 ka pwersa sa berdugong 2nd IB, CAFGU ug pulis ang napatay sa upat ka mga aksyong gerilya sa mga Pulang manggugubat sa tulo ka lungsod sa prubinsiya.

Ang una sa serye mao ang koordinadong aksyong gerilya sa Barangay Locso-an, Placer ug Barangay Gaid, Dimasalang niadtong Marso 22. Ang mga armadong aksyon mipatay sa 10 ka tropa sa 2nd IB ug kapulisan samtang labing menos pito ang nasamdan. Pipila sa mga samaran, sa ulahi, namatay usab.

Niadtong Marso 24, gipabusikaran sa mga operatiba sa BHB ang detatsment sa CAFGU sa Barangay Manlut-od, Placer. Gipahigayon ang operasyon alas-11 sa gabii nga nagpakurat sa armadong pwersa sa kaaway sa detatsment. Upat ka mga sundalo ug mga personahe sa CAFGU ang namatay. Giguba usab sa mga operatiba sa BHB ang tulo ka payag sa maong detatsment.

Gisundan kini sa laing operasyon demolisyon niadtong Marso 27 sa BHB sa Barangay Marcella, Uson batok sa Task Force Sagip nga gitukod ni Marcos Jr. Gitaho usab sa yunit ang aktibong depensa niini batok sa mga nag-atakeng pwersa sa 2nd IB sa Barangay Villahermosa, Cawayan niadtong Marso 20. Napatay dinhi ang kumander sa miatakeng yunit sa AFP.

Paglapas sa AFP sa internasyunal nga makitawhanong balaod

Atol sa mga aksyong gerilya sa BHB, nagpakaylap ang AFP og bakak nga miatake kuno ang BHB duul sa eskwelahan. Gibalikbalik pa sa kalihim sa Department of Education (DepEd) nga si Sara Duterte ang maong bakak.

Sa pagkatinuod, layo ra sa sibilyang populasyon ug eskwelahan ang nahitaboan sa engkwentro tali sa BHB ug AFP. Apan tungod sa grabeng kakurat ug kahadlok, midagan ug namusil ang pwersa sa 2nd IB sulod sa mga tunghaan sa duha ka barangay.

Niadtong Marso 20, namusil ug nagpabuto og M203 ang mga sundalo duul sa Villahermoso National High School sa Cawayan. Niadtong Marso 22, miatras ang mga tropa sa militar ug pulis sa Locso-an National High School human sa engkwentro sa BHB. Nagbunga og grabeng kahadlok ang maong mga insidente sa mga estudyante ug mga magtutudlo.

Gimakmak sa Pambansang Katipunan ng mga Magbubukid (PKM) sa isla ang nagkatag nga tropa sa AFP-PNP-CAFGU, nga daw “nigawas ang ikog” ug “nangurog ang tuhod.” Gigamit nila ang mga sibilyan, bisan mga bata, isip taming aron dili sila sa atakehon sa BHB. Samtang, gidakop sa kapulisan ang upat ka sibilyan sa lungsod sa Cawayan tungod sa pakasala nga ilang “gipadayon” ang mga Pulang manggugubat sa ilang tagsa-tagsa ka balay usa ka adlaw sa wala pa ang engkwentro. Ang upat gipasakaan og kasong pagpatay.

Aron labaw pang ipakaylap ang kahadlok ug kalisang sa prubinsiya, mibubo ang AFP og dugang 500 ka mga tropa sa pasumangil nga pagdepensa sa kaayohan sa mga estudyante ug magtutudlo. Dugang pa kini sa dili mokubos sa lima ka batalyon sa militar ug pulis nga dugay nang nagpakaylap of terorismo sa mga masang Masbatenyo.

Matud sa NPA-Masbate, katuyuan sa bag-ong deploy nga mga tropang militar nga protektahan ang interes sa mga dagkong negosyo, kumpanya sa pagmina ug mga proyektong eku-turismo nga maoy nagdala og kadaot sa masang Masbatenyo.

Sunod-sunod nga taktikal nga opensiba sa BHB sa Masbate