Internasyunal nga Adlaw sa Kawalay Yuta. Nagtapok ang mga mag-uuma atubangan sa upisina sa DAR sa Metro Manila isip pakighiusa sa Kalibutanong Adlaw sa Kawalay Yuta niadtong Marso 29. Sa tibuok kalibutan, gibanabanang 800 milyon ka mag-uuma ang walay kaugalingong yuta tungod sa kawalay tinuod nga reporma sa yuta ug mga neoliberal nga palisiya nga nagtukmod sa pagpangilog ug pagpangawkaw sa mga imperyalistang kumpanya sa ilang mga umahan, pangisdaanan ug yutang kabilin. Nagprotesta usab ang mga mag-uuma sa Panay, Bicol ug Lupang Ramos sa Cavite.

Puasa sa mga detenido sa Negros. Nagpuasa ang mga detenidong pulitikal sa Negros niadtong Marso 30 aron dumdumon ang ika-4 nga tuig sa “Oplan Sauron 2” ug manawagan og hustisya alang sa mga biktima niini. Niadtong Marso 30, 2019, 14 ka mag-uuma ang gipatay sa mga pulis ug militar sa Canlaon, Manjuyod ug Sta. Catalina sa Negros Oriental humang malisyoso silang gilambigit sa armadong kalihukan.

Reklamo sa mga drayber sa dyip, tubagon. Sa Cebu, nagprotesta ang mga drayber sa Piston-Cebu niadtong Marso 31 aron ipanawagan ang pagpalagpot kang LTFRB-7 Regional Director Eduardo Montealto tungod sa iyang kawalay-aksyon sa isyu sa jeepney phaseout.
Panalipdan ang Norte. Milibot sa mga ahensya sa estado sa Metro Manila ang mga minorya ug tigpanalipud sa tawhanong katungod gikan sa Northern Luzon niadtong Marso 20-21. Giduso nila ang pagbasura sa gama-gamang kaso batok sa pito ka aktibista nga giilang NL7, paghunong sa pagpamomba sa mga sibilyang komunidad ug uban pang paglapas sa katungod sa katawhan sa Norte.

Kabatan-onan kontra ROTC ug taas-matrikula. Magkadungan nga nagprotesta ang mga grupo sa kabatan-onan sa walo ka eskwelahan niadtong Marso 24 aron babagan ang ginaduso nga mandatory ROTC sa rehimeng Marcos II. Gipadayag usab sa mga kabatan-onan ang pagbabag sa planong pagsaka sa matrikula ug uban pang mga balayrunon sa mga pribadong unibersidad. Nakighiusa sa protesta ang mga estudyante sa Far Eastern University, University of Sto. Tomas, Ateneo de Manila University, University of the East, ug iba pang unibersidad sa Metro Manila.

Pribatisasyon sa CENECO, ginababagan. Nagprotesta ang mga empleyado ug konsyumer sa Central Negros Energy Cooperative sa Bacolod City niadtong Abril 4 aron babagan ang pribatisasyon sa serbisyo sa kuryente. Matud nila, magbunga kini og pagmahal sa singil ug pangit nga serbisyo sama sa nahitabo sa Bacolod City Water District (BACIWA).