Duha ka kaso sang pagpanglugos sang mga suldado sang 94th IB ang ginreport sang mga residente sang Barangay Carabalan, Himamaylan City, Negros Occidental. Nahitabo ang krimen sang maghiwat sang bayle (sinaot) ang mga suldado sa barangay sadtong ulihi nga semana sang Agosto. Sa gab-e sang sinaot, nasaksihan sang mga residente ang pagpalapit sang lima ka lalaki nga suldado sang 94th IB kag pagpamilit nila nga updon ang 15-anyos kag isa pa ka dalaga sa ila nga kampo.

Natandaan sang mga residente ang nawong sang lima ka mga tropa nga kabahin sa Retooled Community Support Program (RCSP) nga nagatinir sa lugar. Base sa pamilya sang mga biktima, nakasuksok sang uniporme sang militar sang nagpuli pagkasunod adlaw ang duha ka dalaga.

Pagpatay. Gintiro sang wala pa nakilala nga personahe ang tigpamahayag nga si Juan Jumalon sang 94.7 Calamba Gold FM sa Calamba, Misamis Occidental samtang nagabalita sa radyo sadtong Nobyembre 5 sang aga. Nakuhaan sa live nga bidyo sa Facebook ang pagtiro sa iya.

Sa Sorsogon, ginpatay sang mga binayran nga hitman sang militar ang mangunguma nga si Arnel Halum sadtong Nobyembre 5 sa Sityo Kamandag, Barangay San Pascual, Casiguran. Nagabulig siya sa iya nga bayaw sa pagpamanit sang lubi sang ginluthang.

Pag-aresto. Gintago sang 203rd IBde kag gindingutan sang mga kinamatarung ang mga Pulang hangaway nga sila ni Sonny Rogelio (Ka Ed) kag Sonny Sambutan (Ka Omeng) nga nadakop sadtong Oktubre 17 sa Sityo Manambao, Barangay Santa Cruz, Bongabong, Oriental Mindoro. Natultol sang pamilya si Rogelio sadtong Nobyembre 2 sa AFP Medical Center sa V. Luna, Quezon City, wala pa nakit-an tubtob subong si Sambutan.

Sa Camarines Norte, gindakop kag ginbilanggo sang 9th IB ang tumandok nga si Erick Andaya sadtong Setyembre 23 sa Barangay Malaya, Labo. Upod ang biktima sang iya mga katribu nga nagdinalagan sang ginpangtiro sang mga suldado.

Blokeyo sa pagkaon. Nagtuga sang lapnagon nga gutom kag kaimolon ang pagharang pang-ekonomiya nga ginpapanaog sang mga yunit sang 2nd ID sa Barangay Lumutan kag Barangay Pagsangahan, General Nakar, Quezon. Ang blokeyo ang ginpatuman pila ka semana sugod sang ginsugdan sang 80th IB, 1st IB kag sang pulis ang operasyon kombat sa banwa sadtong Setyembre.