Nagsira ang masobra 250 ka pabrika sang panapton sa Bangladesh halin sang nagligad nga semana sa atubang sang pagprotesta sang linibo ka mamumugon sini. Naglupok ang kaakig sang mga mamumugon pagkatapos sang tanyag sang Bangladesh Garment Manufacturers and Exporters Association (BGMEA), hugpong sang mga tag-iya sang pabrika, sa ahaw nga 25% nga pagsaka sang bulanan nga minimum nga sweldo ukon 10,400 taka ($90) halin sa nagaluntad nga 8,300 taka ($75 ukon ₱4,125).

Masyado ka layo ini sa ginaduso nila nga pagtaas padulong sa 23,000 taka ($209) nga base sa ila “pinakamanubo nga minimum” para mabuhi nila ang ila nga mga pamilya. Ulihi nga nagtigayon sang negosasyon para pasakaon ang ila sweldo sadtong 2017.

Isip sabat, mapintas nga ginbungkag sang mga pulis ang mga protesta paagi sa tear gas, sound grenade kag shotgun pellets. Duha ka mamumugon ang napatay sa mga pagbungkag nga ini.