Pagkatapos sang 20 ka adlaw nga pagpaandam sang “todo-todo nga pagpanakop” sa Gaza, ginlusob sang limitado nga tropa sang Zionistang Israel ang na-aminhan nga bahin sang duta sang mga Palestino sadtong Oktubre 27. Sa kober sang malaparan nga pagpamomba nga nagatarget sa mga kable kg linya sang komunikasyon, lubos nga kahambugan nga nagsulod ang mga tropa nga sakay sang tangke, buldoser, armored vehicle kag iban pa nga salakyan militar.

Ginsugata sila sang mga bomba, eksplosibo, mortar kag granada sang mga hangaway sang Izz ad-Din al-Qassam Brigades, ang armado nga pakpak sang grupo nga Hamas (Islamic Resistance Movement). Sa dikit nga mga inaway sang tangke batuk sa hangaway, ginpakita sang al-Qassam ang madalom nga ihibalo sini sa mga taktika kag kagamitan sang Israel.

Sandig sa tigpamaba sini nga si Abu Obieda, napalupok kag nabungkag sang al-Qassam ang indi magnubo sa 22 ka salakyan militar sa una nga 48 oras pa lang nga pagpanakop. Sa ikaduha nga higayon, ginkibot sini ang Israel Defense Force (IDF), nga kalabanan wala sang inagihan sa aktwal nga pakig-away. Madamo ang napatay sa IDF, kabahin ang kumander sang batalyon sang mga tangke.

Nagasalig ang Hamas nga mapaslaw sini ang anuman nga pwersang Israeli sa duta kung sa diin superyor ang bentahe sini sa tereyn kag suportang masa. Madasig kag likom nga nagabalhin-balhin ang mga hangaway sini gamit ang milya-milya nga mga tunnel ukon lulutsan sa idalom sang Gaza. Ang mga tunnel nga ini ang wala nagakawasak sang pagpamomba, indi mahimo nga sudlon sang mga tangke kag may kaugalingon nga sistema sang komunikasyon nga indi sakop sang elektroniko nga sarbeylans sang Israel.

Ang Hamas ang nagahari nga partido sa Gaza. Produkto ini sang nauna nga intifada ukon pag-alsa sang masa sadtong 1987 kag may lapit nga kaantanan sa iban nga Islamikong grupo sa Middle East. Sadtong 2006, napili ini nga tigdumala sang Gaza. Wala sini ginbuy-an ang armadong pagbato bilang nagapanguna nga hinganiban batuk sa brutal nga pagpangsakop sang Israel. Sa nagligad nga mga tinuig, nagpauswag ini sang kaugalingon nga produksyon sang mga mortar, rocket-propelled grenade (RPG), salakyan pagsalom, drone kag iban pa nga armas.

Katimbang sang mga operasyon sang Hamas ang iban nga mga armadong grupo sa Gaza pareho sang Al-Quds Brigade, Islamic Jihad kag Popular Liberation Front of Palestine.

Una na nga ginkibot sang al-Qassam ang Zionistang Israel sang ginlunsar sini ang Al-Aqsa Flood sadtong Oktubre 7. Wala napunggan, ukon natiktikan lang man, sang mga abanteng sistema sang sarbeylans, drone, elektronikong kagamitan, mga satelayt kag bisan sang adlaw-adlaw nga pagpang-atake sang pwersang Israeli ang sorpresang atake sini.

Base kay Obieda, produkto ang operasyon sang pila ka tuig nga preparasyon kag paghanas, pagtuon sa kinaiya kag kagamitan sang kaaway, kag pagpanglansi sa dambuhala nga sistema sang sarbeylans sini. Planado, madasig kag maathag ang mga katuyuan sang pagpang-atake nga ginpatigayon halin sa duta, tubig kag mangin sa kahawaan gamit ang mga paraglider.

Isip balos sa kahuy-anan nga naangkon sa operasyon, nagpadayaw ang Israel. Katimbang ang US, ginbuy-an sini ang ginpasingki nga kampanyang henosidyo sa sibilyan nga populasyon sang Gaza. Sadtong Nobyembre 2, yara sa 25,000 tonelada nga bomba na ang ginhulog sang US kag Israel sa Gaza, katumabas sang duha ka bombing nukleyar. Wala pugong ang pagpangbungkag sini sa mga balay, ospital, eskwelahan, simbahan, sentro sang ebakwasyon kag mga imprastraktura sang tubig, kuryente kag telekomunikasyon.

Sugod Oktubre 7, masobra 10,000 na ang napatay sa pagpamomba sang Israel, masobra 4,100 mga kabataan kag masobra 2,600 kababainhan. Masobra 500 na ang mga masaker sang tingob-tingob nga pamilya. Wala sang luwas sa Gaza, target mangin ang mga tigpamahayag kag mga ambulansya.

Kadungan sang pagpamomba ang paghostage sang Israel sa mga sibilyan nga Palestino. Yara sa 4,000 mamumugon nga Palestino ang ginhostage sini sa mga kampo militar sang IDF. Naglab-ot naman sa 1,070 ang arbitraryo nga gin-aresto sa West Bank kag East Jerusalem. Nakaagum sila sang grabe nga tortyur, pagpangastigo, pagpakahuya kag pagpanakit sa kamot sang mga suldado kag armado nga settler nga Israeli.

Sa pihak sang terorismo sang Israel, nagpahayag ang Hamas sang kahandaon nga hilwayon ang tanan nga mga bihag nila sa Al-Aqsa Flood paagi sa negosasyon. Sa aktwal, naghilway na ini sang mga kababainhan, bata kag mga tigulang sa makitawhanon nga basehan. Ginapahayag mismo sang mga nahilway ang maayo kag patas nga pagtratar sa ila sang mga hangaway.