Dua a kaso ti panangrames dagiti soldado ti 94th IB ti inreport dagiti residente ti Barangay Carabalan, Himaymaylan City, Negros Occidental. Napasamak ti krimen idi naaddaan ti bayle (pasala) dagiti soldado iti barangay idi maudi a lawas ti Agosto. Iti rabii ti pasala, naimatangan dagiti residente ti panangasideg ti lima a lallalaki a soldado ti 94th IB ken panangpilit da nga ikuyog ti agtawen 15 ken maysa pay a balasang iti kampo da.

Narupaan dagiti bumaryo ti lima a tropa a karaman iti Retooled Community Support Program (RCSP) nga agin-indeg iti lugar. Segun iti pamilya dagiti biktima, nakabado ti uniporme ti militar ti dua a balasang idi nagawid da kabigatan na.

Pammapatay. Pinaltugan ti saan pay nga am-ammo a personahe ni Juan Jumalon ti 94.7 Calamba Gold FM iti Calamba, Misamis Occidental kabayatan nga agipadpadamag iti radyo idi Nobyembre 5 ti agsapa. Naala iti live a bidyo iti Facebook ti panangpaltug kenkuana.

Iti Sorsogon, pinapatay dagiti mabaybayadan a hitman ti militar ti mannalon a ni Arnel Halum idi Nobyembre 5 iti Sityo Kamandag, Barangay San Pascual, Casiguran. Tumultulong isuna iti kayong na iti panagukis ti inyog idi napaltu-paltugan.

Panagaresto. Inlemmeng ti 203rd IBde ken pinaidaman kadagiti karbengan dagiti Nalabbaga a mannakigubat a da Sonny Rogelio (Ka Ed) ken Sonny Sambutan (Ka Omeng) a nakemmeg idi Oktubre 17 iti Sityo Manambao, Barangay Santa Cruz, Bongabong, Oriental Mindoro. Natunton ti pamilya ni Rogelio idi Nobyembre 2 iti AFP Medical Center iti V. Luna, Quezon City. Saan pay a nabirukan aginggana ita ni Sambutan.

Iti Camarines Norte, tiniliw ken imbalud ti 9th IB ti katutubo a ni Erick Andaya idi Setyembre 23 iti Barangay Malaya, Labo. Kadua ti biktima dagiti katribu na a nagtartaray idi pinatu-paltugan dagiti soldado.

Blokeyo ti taraon. Nasaknap a bisin ken kinarigat ti impaay ti blokeyo a pang-ekonomya nga ipatpatungpal dagiti yunit ti 2nd ID iti Barangay Lumutan ken Barangay pagsangahan, General Nakar, Quezon. Ti blokeyo ket impasaknap mano lawas sakbay rugian ti 80th IB, 1st IB ken ti pulis ti kombat nga operasyon iti ili idi Setyembre.