Duha ka kaso sa pagpanglugos sa mga sundalo sa 94th IB ang gitaho sa mga residente sa Barangay Carabalan, Himamaylan City, Negros Occidental. Nahitabo ang krimen dihang magpahigayon og bayle ang mga sundalo sa barangay niadtong ulahing semana sa Agosto. Pagka gabii sa bayle, nasaksihan sa mga residente ang pagduul sa lima ka lalaking sundalo sa 94th IB ug ang ilang pagpamugos sa 15-anyos ug usa pa ka dalaga nga mokuyog sa ilang kampo.

Naila sa mga residente ang lima ka mga tropang myembro sa Retooled Community Support Program (RCSP) nga nagpondo sa lugar. Matud sa pamilya sa mga biktima, naka-unipormeng militar dihang miuli pagkaugma ang duha ka dalaga.

Pagpatay. Gipusil sa wala pa nailang mga personahe ang magsisibya nga si Juan Jumalon sa 94.7 Calamba Gold FM sa Calamba, Misamis Occidental samtang nagreport sa radyo niadtong Nobyembre 5 sa buntag. Naka-live sa Facebook ang pagpusil kaniya.

Sa Sorsogon, gipatay sa mga binayrang hitman sa militar ang mag-uumang si Arnel Halum niadtong Nobyembre 5 sa Sityo Kamandag, Barangay San Pascual, Casiguran. Nagatabang siya sa iyang bayaw sa pagpangbunot og lubi dihang girakrakan siya.

Pag-aresto. Gitago sa 203rd IBde ug gihikawan sa mga katungod ang mga Pulang manggugubat nga silang Sonny Rogelio (Ka Ed) ug Sonny Sambutan (Ka Omeng) nga nadakpan niadtong Oktubre 17 sa Sityo Manambao, Barangay Santa Cruz, Bongabong, Oriental Mindoro. Nakaplagan sa pamilya si Rogelio niadtong Nobyembre 2 sa AFP Medical Center sa V. Luna, Quezon City. Wala pa nakita si Sambutan hangtud karon.

Sa Camarines Norte, gidakop ug gipriso sa 9th IB ang minoryang si Erick Andaya niadtong Setyembre 23 sa Barangay Malaya, Labo. Kauban ang biktima sa iyang mga katribu nga mipaturatoy pagdagan dihang girakrakan sa mga sundalo.

Blokeyo sa pagkaon. Nagbunga og malukpanong kagutom ug kalisud ang blokeyo sa ekonomiya nga gipahamtang sa mga yunit sa 2nd ID sa Barangay Lumutan ug Barangay Pagsangahan, General Nakar, Quezon. Gipahamtang ang blokeyo pipila ka semana sukad nga gisugdan sa 80th IB, 1st IB ug sa pulis ang operasyong kombat sa lungsod niadtong Setyembre.