Nakahinun-anon sang Ang Bayan si Kaupod Coni Ledesma agud hibal-on ang panan-awan sang Special Office for the Protection of Children sang National Democratic Front of the Philippines may kaangtanan sa kahimtangan sang mga bata sa Gaza sa tunga sang wala untat kag wala may ginapili nga mga atake sang Israel. Base sa nagkalain-lain nga mga balita, kasubong nga lulubngan na ang Gaza sang mga bata, kung sa diin indi magnubo sa 40% sang mga napatay nga Palestino, kag nagadako pa, amo ang mga bata.

Ang Bayan (AB): Kaangot sa napanahon nga palayag sang NDFP SOPC bahin sa pagmonitor kag pagpasiguro sa kinamatarung sang mga bata sa tunga sang mga armadong banggianay, ano ang tindog sang NDFP sa padayon nga okupasyon kag paglapas sa tawhanon nga kinamatarung sa Gaza?

Coni Ledesma (CL): Madugay na nga nagapanindugan ang NDFP para sa kinamatarung sang pumuluyong Palestino para sa ila nga kadutaan. Ang nagaluntad nga inaway nga ginalunsar sang Hamas kag pumuluyong Palestino ang gyera para sa pungsodnon nga kahilwayan.

Ang nagakahitabo subong sa Gaza ang genocide. Ang ginahimo sang Israel amo ang hayag nga paglapas sa International Humanitarian Law.

Kag ang pinakamalala nga trahedya nga ang mga bata ang pinakadako nga biktima sang sini nga gyera. Ginatantya nga 40% sang mga biktima. Indi pa upod diri ang mga bag-o bun-ag nga lapsag nga nagkalamatay sa incubator tungod sa kawad-on sang lana nga wala gintugot sang Israel nga makasulod sa Gaza.

Ginapatay sang gyera sa Gaza ang bwasdamlag sang pumuluyong Palestino. Pero lig-on ang pumuluyong Palestino. Lapaw sa 75 ka tuig na sila nga nagahimakas para makabalik sa ila nga duta. Mahimo nga mapatay sang mga bomba ang ginatos sa ila, pero ginatos nga sobra pa ang magabangon kag igapadayon ang ila paghimakas.

AB: Ano ang pagkapareho kag kinalain sang sitwasyon sang mga bata sa tunga sang armado nga banggianay sa Pilipinas kag Palestine?

CL: Ang mga Palestino ang ginpalayas sa ila kadutaan. Sa isa ka bahin, may kapareho ini sa mga lumad nga nagakapilitan nga maghalin sa ila mga kadutaan kag puluy-an tungod sa militarisasyon. Pareho sang mga Palestino, ang mga Lumad kag iban pa nga mga pumuluyong Pilipino sa kabukiran ang ginapangbomba. Ang mga Palestino ang biktima sang pagpamomba sang Israel kag ang mga Pilipino sa kabukiran ang ginabomba sang reaksyunaryo nga militar.

Ang kinalain kay tanan nga pumuluyo sang Gaza ang target sang pagpamomba, istraping kag pagpang-aresto sang Israel. Mga ordinaryo nga pumuluyo sila nga ginwasak ang mga puluy-an kag ginpatay ang ila mga pamilya. Sa kaso sang Pilipinas, ang target sang (pagpamomba sang) militar amo ang pumuluyo sa kabukiran nga ginapasibangdan nga tigsuporta sang New People’s Army, kag indi ang mga pumuluyo nga yara sa syudad.

AB: Ano ang mga tikang nga ginahimo sang NDFP agud mabuyagyag ang malala kag mabaskog nga paglapas nga ini sa lokal kag internasyunal nga lebel?

CL: Nagpagwa sang pahayag sang pagkundena ang NDFP sa agresyon sang Israel. Nagpagwa man sang mga pahayag ang Special Office of the Protection of Children isip pagpakamalaut sa pagpatay sa mga bata sa Gaza. Nagpagwa man sang pila ka pahayag ang PKP isip pagkundena sa agresyon.

Magluwas sa mga ini, ang mga pwersa sang NDFP sa Pilipinas kag iban nga pungsod ang nakigbahin sa nagkalain-lain nga hublag batuk sa genocidal war sang Israel.

AB: Ano ang dapat nga himuon sang mga tigpangapin sa kinamatarung sang mga bata, tigpangapin sa tawhanon nga kinamatarung, mga pumuluyo nga mapinalanggaon sa kahilwayan kag mga rebolusyonaryo sa Pilipinas kag sa bug-os nga kalibutan sa atubang sang nagasingki nga mga Zionistang atake sa pumuluyo kag kabataang Palestino?

CL: Una sa tanan, ginasugyot ko nga maghiwat sang porum kag iban pa nga mga talakayan nga magahatag sang impormasyon sa publiko may kaangtanan sa mga kabangdanan sa likod sang pag-atake sang Israel sa pumuluyong Palestino. Kinahanglan matalakay ang kasaysayan sang mga Palestino nga ginpalayas sa ila kadutaan. Madamo pa sa gihapon ang nagapati nga ang Israel ang naagrabyado. Wala sila nakahibalo nga ang mga Palestino ang gin-agawan sang ila nga dutang puluy-an kag nagapuyo subong sa isa ka okupado nga teritoryo.

Nagapanawagan man ako sa tanan nga pumuluyo nga mapinalanggaon sa kahilwayan, indi lang sa Pilipinas kundi sa bug-os nga kalibutan, nga makigbahin sa mga hublag nga nagapanawagan sa pagpauntat sa gyerang agresyon sang Israel. Bugtong nga ang naga-ugyon nga tingog sang pumuluyo sa kalibutan ang makapauntat sa gyera nga ini.