Hilwayon ang Palestine! Masobra 600 ang nagprotesta sa embahada sang Israel sa Bonifacio Global City, Taguig City sadtong Oktubre 31, para sawayon ang okupasyon, wala-untat nga pagpamomba, kag henosidyo sang Zionistang gubyerno sang Israel sa Gaza. Ginpangunahan ang protesta sang International League of People’s Struggles (ILPS) kag Bagong Alyansang Makabayan (Bayan). Bag-o sini, nagprotesta ang mga Moro sa Manila sadtong Oktubre 26 isip kabahin sang serye sang mga protesta nga ginlunsar sa Bangsamoro sa nagligad nga semana. Naglunsar man sang mga protesta sa Cebu.

Ipakita ang mga desaparesidos. Nagtipon ang mga himata, tigsuporta kag grupo sang tawhanon nga kinamatarung sa Quezon City sadtong Nobyembre 2 para liwat nga ipanawagan ang pagpalutaw sa mga biktima sa pilit nga pagkadula sang estado. Sa idalom ni Marcos Jr, 11 na ang nalista nga desaparesido.

Protesta kontra taas-presyo sang petrolyo. Isa ka koordinado nga protesta sang mga drayber kag opereytor sang dyip ang ginpatigayon sa Metro Manila sadtong Oktubre 24 para sawayon ang liwat nga pagtaas sang presyo sang mga produkto nga petrolyo sa ika-13 nga higayon halin sadtong Hulyo. Sa ulihi nga pagsaka, ginatantya nga naglab-ot na sa ₱19/litro ang gindugang sa diesel samtang halos ₱14/litro ang nadugang sa presyo sang gasolina kag kerosene halin sang sugod sang tuig. May yara sang kadungan nga protesta sa mga syudad sang Baguio kag Cebu, kag sa Iloilo kag Bacolod isa ka adlaw bag-o sini.

Husto nga kumpensasyon sa mga rider, ihatag. ginatos ka mga rider ukon mga tigdeliber sang kumpanyang Grab ang nagprotesta sa Quezon City sadtong Oktubre 25 para sawayon ang indi makatarunganon nga pagbuhin sang ₱10 nga kita nila kada deliberi. tungod sa buhin, ang sang una nga ₱45 nga minimum nga ganar nila sa deliberi ang mangin ₱35 na lang. ginkundenar man sang grupo ang pagkakas sang Grab sa siyam ka drayber nga nakigbahin sa asembleya sadtong Oktubre 19.