Ilingkawas ang Palestine! Kapin 600 ang nagprotesta sa embahada sa Israel sa Bonifacio Global City, Taguig City niadtong Oktubre 31, aron batikuson ang okupasyon, walay hunong nga pagpamomba, ug henosidyo sa Zionistang gubyerno sa Israel sa Gaza. Gipangunahan ang protesta sa International League of Peoples’ Struggles (ILPS) ug Bagong Alyansang Makabayan (Bayan). Ayha niini, nagprotesta ang mga Moro sa Maynila niadtong Oktubre 26 isip kabahin sa serye sa mga protestang gilunsad sa Bangsamoro sa milabayng mga semana. Aduna usay protesta sa Cebu.

Ilutaw ang mga desaparesidos. Nagtapok ang mga pamilya, tigsuporta ug grupo sa tawhanong katungod sa Quezon City niadtong Nobyembre 2 aron subling ipanawagan ang paglutaw sa mga biktima sa estado sa pugsanong pagkawala. Ilalum ni Marcos Jr, 11 na ang natahong desaparesido.

Protesta kontra taas-presyo sa petrolyo. Usa ka koordinadong protesta sa mga drayber ug opereytor sa dyip ang gilunsad sa Metro Manila niadtong Oktubre 24 aron batikuson ang subling pagsaka sa presyo sa mga produktong petrolyo sa ika-13 nga higayon sukad niadtong Hulyo. Sa ulahing pagsaka, gibanabanang mikabat na sa ₱19/litro ang gidugang sa diesel samtang halos ₱14/liter ang nadugang sa presyo sa gasolina ug kerosene gikan sa pagsugod sa tuig. Adunay susamang protesta usab sa mga syudad sa Baguio ug Cebu, ug sa Iloilo ug Bacolod usa ka adlaw ayha niini.

Hustong kumpensasyon sa mga rider, ihatag. Gatusan ka rider o mga tigdeliber sa kumpanyang Grab ang nagprotesta sa Quezon City niadtong Oktubre 25 aron batikuson ang dili makatarunganong pagkibhang og ₱10 sa ilang kita kada deliberi. Tungod sa kaltas, ang kanhing ₱45 nga minimum nga kita nila sa kada deliberi mahimong ₱35 na lang. Gikundena usab sa grupo ang pagtangtang sa Grab sa siyam ka drayber nga misalmot sa asembleya niadtong Oktubre 19.